Presidenti Ilir Meta publikoi sot pyetjet që i ka drejtuar Komisionit të Venecias lidhur me ndryshimet në Kodin Zgjedhor, ku duket se gjithçka lidhet me ndalimin e koalicioneve parazgjedhore.
Meta tha në një konferencë për mediat se riktheu në Kuvend ligjin për Kodin Zgjedhor për të shmangur një krizë zgjedhore.
Kreu i Shtetit tha se iu drejtua Venecias për garancitë proceduriale lidhur me ndryshimet në Kodin Zgjedhor. Meta tha se nuk duhet të ketë një përshkallëzim të situatës së rënduar, ndërsa kërkoi një reflektim nga mazhoranca.
Meta kërkoi nga mazhoranca dhe Kryeministri Edi Rama që të trajtojnë me përgjegjshmëri çështjet që kanë të bëjnë me Kodin Zgjedhor.
“Opozita e bashkuar më kërkoi që t’i drejtohem Venecias dhe unë e mora parasysh këtë kërkesë, pasi kjo opozitë më parë mori parasysh sugjerimin tim për të mos vënë si kusht qeverinë teknike, për të nënshkruar marrëveshjen e 5 qershorit”, tha Meta.
Ai tha se shpreson që të ketë një reflektim nga Kryeministri Edi Rama, ndërsa paralajmëroi se do të kërkonte mbështetjen e popullit shqiptar për të garantuar të ardhmen europiane të vendit.
“Se si do të sillet mazhoranca duhet parë, por ka zero mundësi që populli opozitar të mos përfaqësohet në zgjedhjet e 25 prillit. Nuk e shoh si mundësi që opozita e bashkuar të mos marrë pjesë në zgjedhje”, tha Meta.
Presidenti i ka bërë thirrje ligjvënësve që të veprojnë me përgjegjshmëri, nëse herën e parë nuk e kanë pasur të qartë se çfarë kanë votuar.
