Replikat e kryeministrit Edi Rama me një gazetare gjatë një konference për mediat zhvilluar së fundmi, është bërë shkak i një reagimi nga ana e ekonomistit Pano Soko.
Ky i fundit, në një video që është shpërndarë me shpejtësi në rrjetet sociale, shpjegon me shifra taksat që paguan gazetarja duke supozuar se paga e saj është 70 mijë lekë neto.
(Në përgjigje të pyetjes së Ramës ndaj gazetares, ‘sa taksa paguan ti’) Pano llogarit se me këtë pagë të shpenzuar, një qytetar paguan rreth 500 mijë lekë të vjetra taksa direkte dhe indirekte.
“Në kapitalizëm ai që paguan është pronari, ai që paguhet është punëtori. Ti e di vetë se çfarë je! Nuk i flitet pronarit ashtu”, i drejtohet Pano-Ramës.
“Taksat tona, ti nuk paguan, ne paguajmë për ty. Ti paguhesh nga ne. Ne të paguajmë ty rrogën 230 mijë lekë në muaj, çdo muaj. Por jo vetëm kaq. Ne paguajmë 250 mijë euro për ty. Për transportin, për avionët, për hotelet, për pritjet e përcjelljet, për eskortat, i paguajmë ne. Ti nuk paguan. Ti nuk ke paguar asnjëherë në fakt, që kur ke ardhur në Shqipëri. Sepse kur erdhe u bëre direkt ministër Kulture, paguanim ne për ty, pastaj u bëre kryetar bashkie, paguanim ne për ty, edhe kur ishte kryetar i opozitës, paguanim ne për ty. Edhe sot që je kryeministër, paguajmë ne për ty. Prandaj ti se di se sa paguajnë taksa njerëzit dhe të duken si fjalë, si shifra”, shton eksperti i ekonomisë.
