Sezoni 2020/2021 i Champions League starton mbrëmjen e sotme. Ndeshja kryesore do të jetë ajo mes PSG-së dhe Manchester United e vlefshme për grupin H.
Në vigjilje të sfidës, Thomas Tuchel ka konfirmuar se Neymari është i gatshëm për të luajtur pas mungesës ndaj Nimes, megjithatë, Marco Verratti nuk është në dispozicion.
Në dyshim për ekipin vendas janë edhe Thilo Kehrer, Mauro Icardi e Leandro Paredes, ndërsa Angel Di Maria që ka munguar në dy ndeshjet e fundit për shkak të pezullimit, mund të luajë ndaj ish-skuadrës së tij.
Edhe Ander Herrera do të ndeshet për herë të parë me ish-klubin e tij prej se u largua në vitin 2019. Të pezulluarit në Ligue 1, Marquinhos dhe Layvin Kurzawa, janë në dispozicion të trajnerit në garën evropiane.
Nga ana tjetër, për Ole Gunnar Solskjaer nuk do të jenë në dispozicion Harry Maguire, Phil Jones, Marcos Rojo e Eric Bailly. Një problem i vërtetë për “Djajtë e Kuq” pasi pothuajse e gjithë mbrojtja do të mungojë. Në mungesë të një zgjidhje për situatën e krijuar, nëse do të jetë e nevojshme, Scott McTominay mund të detyrohet të luajë në qendër të mbrojtjes, ndërsa trajneri i Unitedit mund të luajë me tre mbrojtës për të zhvilluar lojë ofensive.
Formacionet e mundshme:
PSG: Navas, Florenzi, Diallo, Kimpembe, Kurzawa, Herrera, Gueye, Pereires, Di Maria, Neymar, Mbappe
Man.United: De Gea; Tuanzebe, Lindelof, Shaw; Wan-Bissaka, McTominay, Fred, Telles; Fernandes; Rashford, Martial.
