Kultivimi i lëndëve narkotike vijon të jetë një nga problematikat më të mëdha teksa shifrat flasin për rritje të fenomenit. Gjatë 9 mujorit të parë të vitit janë sekuestruar 45 mijë bimë më shumë se e njëjta periudhë e një viti më parë.
Të dhënat zyrtare të Policisë së Shtetit konfirmojnë rritjen e fenomenit të kultivimit të kanabisit gjatë këtij viti. Në 9 mujorin e këtij viti janar-shtator sipas policisë, janë asgjësuar rreth 130 mijë bimë, nga 85 mijë që ishin djegur gjatë 9-mujorit të vitit të shkuar. Periudha që ka patur më shumë bimë të sekuestruara dhe asgjësuara, është qershori me 36 mijë bimë, për të vijuar me muajt korrik gusht dhe shtator me rreth 25 mijë bimë.
Zonat më problematike vijojnë të jenë zona e malësisë së Krujës, Tepelenës, Gjirokastrës, apo Vlorës, por dhe qyteti i Shkodrës. Qyteti verior konsiderohet dhe si më problematiku pasi në fillim të muajit tetor u vranë dy të rinjtë Klement Pepaj dh Vilson Çutaj pas konfliktit për kanabisin me kushëririn e tyre.
Në disa prej zonave kanabisi është mbjellë për herë të dytë apo të tretë pas ndërhyrjes së policisë duke i shkatërruar bimët me kanabis. Pak ditë më parë një skaf me të paktën 1.2 ton kanabis u kap në brigjet greke, që sipas medieve greke kishte mbërritur nga Shqipëria./Oranews/
