Presidenti Ilir Meta i ka bërë thirrje Prokurorisë për të hetuar me shumë përgjegjësi dhe tyransparencë çështjen e inceneratorëve. Reagimi i Presidentit ka ardhur në një kohë kur Partia Demokratike ka depozituar në SPAK kallzimin penal ndaj Kryeministrit Edi Rama, ministrit Arben Ahmetaj, Kryebashkiakut Erion Veliaj, ish-ministrit Lefter Koka dhe dy biznesmenëve, Mirel Mërtiri dhe Klodian Zoto.
Meta u shpreh se në këto momente, kur vendi po përballet me krizën, çdo qindarkë publike duhet të përqëndrohet në mbrojtjen e shëndetit të qytetarëve, të personelit shëndetësor dhe të familjeve në nevojë.
I pyetur nga gazetarët në konferencën javore për shtyp se çfarë mendimi ka ai për aferën e inceneratorëve, që e ka ngritur Partia Demokratike me forcë, Meta tha se kjo është një çështje mjaft serioze, duket qartë dhe me sa di unë qartë dhe po hetohet nga Prokuroria dhe duhet të hetohet me shumë përgjegjësi dhe transparencë.
“Po hetohet edhe nga mediat që kanë bërë disa investigime. Është me shumë rëndësi në këtë situatë kur ekonomia është përkeqësuar dhe pasojat janë serioze për ekonomitë e familjeve shqiptare dhe është shumë e rëndësishme që prioriteti i çdo qindarke publike të jetë i përqëndruar në mbrojtjen e shëndetit të qytetarëve, të personelit shëndetësor dhe familjeve në nevojë që kjo situatë të kalojë sa më pak pasoja për familjet shqiptare”, u shpreh Meta.
