Enkelejd Aibeaj, ish-deputet i PD, ka reaguar ndaj dy ngjarjeve të rënda kriminale, vrasjes së një biznesmeni në Himarë, dhe denoncimit të bërë nga një biznesmen në Tiranë për tentativë për atentat. Ish-deputeti i ka bërë thirrje policisë dhe prokurorisë që të hetojnë me shpejtësi ngjarjet dhe të mos i zvarrisin.
Alibeaj shkruan në rrjetet sociale se shpejtësia me të cilën do të hetohen ngjarjet janë tregues kyç për gatishmërinë e policisë dhe të prokurorisë për të zbuluar të vërtetën
“Në Himarë, një biznesmen u vra në atentat, në mes të ditës; Në Tiranë, një biznesmen denoncon në polici një tentativë për atentat.
Të dyja janë raste tronditëse, që tregojnë shthurjen e kësaj qeverie në muajt e fundit të saj.
Shpejtësia me të cilën do të hetohet denoncimi i biznesmenit Andon Dhima do të jetë një tregues kyç për gatishmërinë e policisë dhe të prokurorisë për të zbuluar të vërtetën.
Zvarritja e çështjeve të tilla, siç e ka zakon prokuroria dhe policia, do të jetë veçse kronikë e një atentati tjetër të paralajmëruar”, shkruan Alibeaj.
