Derbi i qytetit të Liverpool dhuron emocione dhe spektakël, por në fund skuadrat u ndanë në barazim 2-2.
Evertoni i drejtuar nga Carlo Ancelotti, edhe pse zhvilloi një ndeshje intensive dhe me shumë raste, nuk ia doli të merrte më shumë se një pikë ndaj Liverpool-it të Klopp.
Sfida në “Goodison Park” u zhbllokua që në minutën e 3-të, kur Sadio Mane e pati të thjeshtë të devijonte për në rrjetë pasimin e Robertson në krahun e majtë të sulmit.
Goli i barazimit nuk vonoi shumë, teksa në minutën e 19-të krosimi i James Rodriguez nga këndi gjeti kokën e Moise Kean që goditi fort në mesin e portës duke mposhtur portierin Allison.
Pjesa e parë u mbyll në barazim 1-1, për të ardhur te goli i Mohamed Salah në minutën e 71-të, me sulmuesin egjiptian që goditi befasisht një top të kthyer nga mbrojtja, duke i dhënë edhe një herë epërsinë në rezultat Liverpoolit.
Gjithsesi, vetëm 9 minuta më vonë, Evertoni ktheu baraspeshën në rezultat (2-2) pas një finalizimi perfekt me kokë të Calvert-Leëin, i shërbyer nga e majta nga Lucas Digne.
2 minuta para përfundimit të kohës së rregullt, Richarlison i la “Toffees” në inferioritet numerik, pas një ndërhyrjeje të rëndë ndaj kundërshtarit.
Ndërkohë dramat në këtë ndeshje nuk përfunduan këtu teksa Liverpoolit iu anulua një gol i realizuar nga Henderson për pozicion milimetrik jashtë loje.
Edhe me pamjet e përsëritura ishte e vështirë për ta dalluar pozicionin më të avancuar të lojtarit të “The Reds”.
Me këtë rezultat, Evertoni shkon në kuotën e 13-pikëve pas 5 ndeshjeve të luajtura dhe ruan ruan kryesimin e Premier League-s.
