Organizata Botërore e Shëndetësisë ka dhënë parashikime pesimiste sa i takon situatës së pandemisë në Europë, ku ka kërkuar që të ketë një shtim te kufizimeve, nga ana e qeverive. Sipas OBSH-së shkalla e vdêkshmërisë në Janar të vitit 2021, mund të jetë katër deri në pesë gerë më e lartë se ajo në muajin Prill të këtij viti.
“Nëse qeveritë evropiane lehtësojnë kufizimet dhe masat e marra, ecuria e virusit tregon se deri në janar të vitit 2021, shkalla e vdêkshmërisë ditore do të jetë katër deri në pesë herë më e lartë se sa ishte gjatë muajit prilli të 2020, kur ishte edhe piku i valës së parë”, tha Dr Hans Kluge.
Eksperti i OBSH, e bëri këtë deklaratë gjatë konferencës për shtyp të Enjten.
Kluge, drejtori rajonal i OBSH-së për Evropën, tha se Evropa kishte regjistruar këtë javë numrin më të lartë të rasteve të reja me Covid-19 ndërsa virusi po përhapet përsëri me shpejtësi në të gjithë kontinentin.
“Situata epidemiologjike në zhvillim në Evropë ngre shqetësim të madh: rastet e përditshme janë rritur, shtrimet në spital gjithashtu janë rritur dhe Covid është tani shkaku i pestë kryesor i vdêkjeve në rajon, duke vrárë më shumë se 1.000 njerëz në ditë”, tha ai.
Por Kluge tha se kishte arsye për optimizëm sepse situata nuk ishte e njëjtë si gjatë valës së parë të pandemisë dhe masat më të forta në shumë vende evropiane këtë javë mund të shpëtonin qindra mijëra jetë.
“Ne jemi duke regjistruar dy deri në tre herë më shumë raste në ditë krahasuar me Prillin, por pesë herë më pak vdêkje” tha ai, duke bërë thirrje që shtetet të mos lehtësojnë masat, por qytetarët t’i zbatojnë ato për të shmangur përhapjen e koronavirusit.
“Por nëse 95% e njerëzve mbajnë maska dhe zbatohen masa të tjera si distancimi social, Evropa mund të shmangë rreth 281,000 vdêkje deri në Shkurt”, shtoi ai.
Kluge tha se qeveritë duhet të marrin në konsideratë problemet e shëndetit mendor dhe dhunën në familje kur vendosin kufizime dhe të bëjnë gjithçka që të jetë e mundur për t’i mbajtur shkollat e hapura.
Ndërkohë, Komisioni Evropian u ka bërë thirrje vendeve të rritin përgatitjet e tyre, duke këshilluar qeveritë të koordinojnë gjurmimin e kontakteve dhe të vendosin përfundimisht lidhur me një vaksinë për sëmundjen.
