Kryeministri Edi Rama, njëherazi edhe Kryetar i PS-së, prezantoi sot platformën “Deputeti që duam”, ndërsa ftoi të rinjtë e të rejat, apo personat me ide të reja, që të aplikojnë, duke dërguar një video me idetë e tyre dhe pse duan të marrin pjesë në këtë proces.
Rama tha se nga anketimet e përmuajshme që bëhen nga entitetet autonome ne shikojmë situatën se ku jemi, por secili nga ne, ka shumë për të dhënë.
“Në ciklin e parë do të mbledhim të dhënat apo vlerësimet mbi përfaqësuesit tanë në qeveri dhe grupin parlamentar, vlerësime që do të bëhen nga anëtarësia, por edhe çdo kush që i bashkohet platformës.
Kemi ministra të mirë, por e mira nuk ka fund. Ndaj mirëpresim çdo të ri dhe të re, çdokënd që ka ide të reja”, tha Rama. Kreu socialist tha se procesi i dëgjimit të anëtarësisë do të zgjasë 45 ditë, ndërsa ai e konsideroi si një risi.
“Do kenë në dispozicion ku do dërgojnë një video ku do shprehin interesin pse duan të bëhen pjesë e skuadrës. Më pas do dërgojnë edhe CV edhe një letër angazhuese. Ne do të mbledhin të gjitha shprehet e interesit. Jemi shumë të lumtur që të ndajmë këtë eksperiencë tonën me njerëz që ndajnë me ne të njëjtën dëshirë dhe angazhim për të çuar para vendin.
Dua t’iu them të gjithëve që mund të jenë të reja dhe të rinj që sapo kanë mbaruar shkollën me rezultatet të mira që punojnë në shtet, në fermë, në emigracion që janë të mirëseardhur që të shprehin interesin e tyre, Gra dhe burra që vijnë nga eksperiencat si mësuese, mësues, shërbëtorë publikë, ekspertë në çfarëdolloj fushe që punojnë në hapësirën e sipërmarrjes që punojnë në media, kudoqoftë, në fermë. Që e përkthejnë aktivistin e tyre në audienca në rrjete sociale. Cilido që ka pasionin tonë për të kaluar nga fjalët në vepra. Ky është mesazhi që dua të përcjell sot përmes këtij komunikimi”, tha Rama
Lidhur me zbatimin e vendimit për mbajtjen e maskave në publik, Rama tha se me një sy të lirë mbi 90 % e shqiptarëve kanë respektuar mbajtjen e maskave.
“Besoj se zbatimi i rregullave nuk është rezultat i frikës nga gjobat. Edhe unë që kam mbajtur maskën, nuk jam ndjerë mirë sot, por derisa të mësohemi. Besoj se maskat do t’i mbajmë pak si gjatë, po të kemi parasysh stinën e dimrit dhe virozat që qarkullojnë në këtë stinë”, tha Rama. Sipas tij, maska nuk është kot, pasi sot po përdoret kudo në Botë si një mjet parandalues për infektimin nga Covid-19.
“Nëse është kot, atëherë pse përdoret në Gjermani dhe Austri? Mirë këtu se qenka diktatura gjakatare që do t’i mbyllë gojën atyre që duan të flasin, po në vendet e tjera pse përdoret”, tha Rama.
