Pas nëntë vitesh, Serbia ka nisur të respektojë dhe implementojë marrëveshjen për Menaxhim të Përbashkët të Kufijve e cila ishte nënshkruar në vitin 2011 kur në emër të palës kosovare negocionte Edita Tahiri.
Në kohën e vendosjes së firmave në një marrëveshje të tillë, pala kosovare kishte deklaruar se Serbia edhe ligjërisht ka pranuar pavarësinë e Kosovës, ndërsa nga pala serbe ishte thënë se me nënshkrimin e marrëveshjes së IBM-së nuk nënkuptohet njohja e Kosovës.
Për fillimin e implementimit të një marrëveshje të tillë nga Serbia, ka reaguar qeveria amerikane dhe emisari i Trump për dialogun, Richard Grenell, të cilët kanë përgëzuar shtetin serb meqë tashmë janë pajtuar që doganierët t’i vendosin në ndërtesën e përbashkët të financuar nga Bashkimi Evropian në pikën kufitare në Merdare të cilës pala serbe megjithatë i referohet si linjë administrative.
“Lëvizje e madhe. Falënderimi i takon presidentit Trump. Serbia e bën funksional pikëkalimin në Merdare”, thuhet në reagimin e Richard Grenell.
Edhe zëdhënësja e Sekretarit Amerikan ka komentuar veprimin e Serbisë për t’u vendosur në ndërtesën e financuar nga Bashkimi Evropian, duke e quajtur si hap të mirë.
Ambasadori amerikan në Beograd, një veprim të tillë të shtetit serb e ka lidhur me zhvillimet dhe marrëveshjen e 4 shtatorit në Uashington, ku palët janë zotuar edhe për krijimin e MiniSchengenit.
Ndërsa Policia e Kosovës për Gazetën Express kanë konfirmuar se janë të vendosur kaherë në ndërtesën e Bashkimit Evropian për Menaxhim të Përbashkët të Kufijve.
“Policia e Kosovës, në këtë rast zyrtarët kufitar me kohë janë vendosur në objektin në fjalë dhe janë duke i realizuar detyrat sipas autorizimeve dhe kompetencave ligjore”, kanë thënë nga zyra për Informim e Policisë së Kosovës.
Gurthemeli i kësaj pike kufitare ishte vënë në shkurt të 2017-s, derisa Serbia në mënyrë konstante kishte refuzuar që të vendosej në ndërtesën e përbashkët.
Marrëveshja për Menaxhimin e Përbashkët të Kufijve ishte nënshkruar në Bruksel në mes të Kosovës dhe Serbisë, kur negociatat nga pala kosovare i drejtonte Edita Tahiri, derisa nën anën tjetër ishte Borko Stefanovic.
