Ogerta Manastirliu, e pranishme në emisionin “Opinion” nuk ishte në gjendje të jepte asnjë argument sepse duhet mbajtur maska në ambientet e hapura.
Manastirliu tha se maska nuk mbahet kur personi po bën një aktivitet fizik, por nuk ishte në gjendje të thoshte nëse ecja është një aktivitet fizik.
“Maskën duhej ta mbajë gjithkush nga momenti që dalim nga shtëpia. Maska do të mbahet në çdo moment, përveç kur hyn në një lokal për të konsumuar diçka. Por nëse ti lëviz nga tavolina, atëherë duhet të vendoset maska”, tha Manastirliu.
Ministrja e Shëndetësisë nuk ishte në gjendje të jepte argumente sepse tani duhet të mbahet maska dhe nuk ishte e nevojshme para 6 muajsh, kur edhe vetë Kryeministri deklaronte se ajo ishte e panevojshme në ambientet e hapura.
Manastirliu tha se maska që mund të përdoret mund të jenë edhe ato artizanale, edhe pse shumë mjekë dhe ekspertë të shëndetësisë, shprehen se maskat artizanale nuk mund të të mbrojnë nga Covid-19.
“Qytetarët mund të përdorin barriera të thjeshta prej tekstili, pasi maskat kirurgjikale përdoren nga personeli mjekësor. Pra qytetarët mund të përdorin këto barriera mbrojtëse dhe këtë e thotë OBSH”, u shpreh Manastirliu.
Sipas saj, në automjete, kur je me të afërmit tuaj, nuk do të përdoret maska, sikundër edhe në rastet kur bie shi do të ketë specifikime.
