Kryetarja e LSI, Monika Kryemadhi, ka zhvilluar një takim me Kryesinë e kësaj partie në Durrës.
Kryemadhi u shpreh se në këto zgjedhje kemi një garë shumë të madhe brenda partisë, për të gjetur emrat e duhur të cilët do drejtojnë LSI-në drejt fitores së zgjedhjeve të ardhshme.
Ajo e quajti një proces të drejtë dhe të nevojshëm zgjedhjen e ekipit drejtues në zgjedhjet e 25 prillit.
“Kjo është një garë e mirë dhe jo e keqe, pasi ne këmi shumë figura të nderuara intelektuale si mjeke, ekonomistë të cilët janë të gatshëm të kontribuojnë në përmirësimin e cilësisë së jetës dhe mirëqënies në vendin tonë”, tha ajo.
E bindur te fitorja, Monika Kryemadhi kishte një paralajmërim të prerë për Edi Ramën nëse do të tentojë që të ndërhyjë në procesin zgjedhor, pasi ky i fundit e quajti LSI-në një parti të degraduar, gjatë replikave me presidentin Meta.
“Me këtë rast përshëndes suflerët e Ramës, Kryeministrin e degraduar dhe shpurën e tij, në Durrës do thyejnë hundët, pasi ka dashur të ndryshojë dhe deformojë qytetarët shqiptarë.
Shiu i 25 prillit do ta lajë baltën e Durrësit për të rikthyer shkëlqimin. Durrësi është më i rëndësishëm se Tirana për krijimin e vendeve të punës, por edhe influencës. Jemi këtu për të ndërtuar të ardhmen e Durrësit dhe të gjithë Shqipërisë”, tha Kryemadhi.
