Kryeministri Edi Rama, i akuzuar si një ndër drejtuesit e qeverive më të zhytur në korrupsion në Europë, thotë se është optimist për luftën ndaj këtij fenomeni.
Në një tryezë ku të pranishëm ishin dhe ambasadorë të vendeve të huaja, Rama tha se lufta ndaj korrupsionit “është një luftë e gjatë”, që nuk mund të fitohet as dhe “brenda një dekade”.
Rama deklaroi se “koka e korrupsionit nuk janë dhe nuk kanë qenë politikanët, por korporata e gjykatësve dhe prokurorëve që kanë garantuar pandëshkueshmëri në sistem”. “Po të mos ishin këta, s’do ishte as korrupsioni spektakolar dhe nganjëherë vrastar i politikanëve”, tha Rama.
Kreu i qeverisë e quajti korrupsionin “pjesë e jetës njerëzore, djalli qe fle te njeriu”.
“Nuk janë njerëzit që korruptojnë sistemin, por janë sistemet që korruptojnë njerëzit. Luftë për ndërtuar sisteme imune dhe për ti vendosur individët, organizatat, në kushte pamundësie për tu tunduar nga korrupsioni dhe për të rënë pjesë e tundimit të tij. Lufta në Shqipëri për të ndërtuar sisteme që mund ta përballojnë ka nisur kur ka nisur reforma në drejtësi, deri atëherë ka qenë një luftë partizane me mullinjtë e erës, e destinuar të riciklojë në mënyrë të ndryshme korrupsionin. Reforma në drejtësi është baza për të pasur një shtet me institucione më të forta se sa përpjekja e individëve, për të korruptuar”, deklaroi.
“Vendet e zhvilluara se kanë ndërtuar sistemin as në një vit as një dekadë, dhe po të shohësh të shkuarën, korrupsioni ka lulëzuar në të gjitha format dhe të gjitha shpërthimet e talenteve që janë mbledhur nga gjithë bota dhe e kanë bërë SHBA atë që është sot.
Shqipëria është ende në një proces rritje, është ende një shtet demokratik shumë i ri dhe pse 30 vjet janë shumë në jetën e një njeriu, në procesin e shtetndërtimit, duke pasur parasysh nga e nisi Shqipëria, pas përmbysjes së sistemit të komunizmit, atëherë patjetër që kemi shumë arsye për të qenë të inkurajuar dhe optimistë për të nesërmen. Reforma në drejtës, e tëra, është absolutisht historike dhe garanci për fëmijët tanë që nesër do jetë imunë nga ajo masë e sëmundjes së korrupsionit që bën dallimin mes shteteve në zhvillim dhe shteteve të zhvilluara”, shtoi ai.
