Kryeministri Edi Rama, deklaroi se numri i banorëve që kanë 24 orë ujë është dhjetëfishuar në krahasim me 7 vite më parë.
Në rrjetin social, Kryeministri ka publikuar shifrat teksa bën edhe krahasimin me vitet e kaluara.
Po ashtu Rama thekson se synimi i tij është që në vitin 2023 të gjithë qytetarët shqiptarë të kenë ujë të pijshëm 24 orë.
Në fakt gjatë qeverisjes së tij, shqiptarëve iu rrit çmimi për ujin, por jo cilësia e përdorimit të tij dhe aq më shumë furnizimi gjatë 24 orëve. Të njëjtin premtim Rama ka bërë edhe në 2013 kur mori mandatin e parë, ndërsa e ripërsërit edhe në 2020, kur po mbyll mandatin e dytë dhe synon të tretin.
“Dhe me këtë fakt të punës sonë të pandërprerë në këto vite për mbylljen e plagës shumë e shumëvjeçare të mungesës së ujit, falë së cilës në dhjetor arrijmë dhjetëfishimin e numrit të banorëve që kanë 24 orë ujë krahasuar me 7 vjet më parë, ju uroj një ditë të mbarë”, shkruan Rama.
