Analisti dhe shkrimtari Kim Mehmeti, në emisionin e tij Këndi i Kimit në SYRI TV, tha se në Shqipëri, tollovia është e plotë.
“Në këtë tollovi përfitojnë politikanët. Në tërë këtë zhurmë përfiton qeveria, që përmes kësaj zhurme mbulon fytyrën e vet dhe në njëfarë mënyrë mbijeton duke nxitur mosmarrëveshje politike, duke krijua probleme edhe aty ku nuk duhet të ekzistojnë,” tha Mehmeti.
Sipas tij, Edi Rama mund ta shpallë veten edhe mbret.
“Qeveria shkakton probleme që më pas të duket sikur po i zgjidh vetë. Kjo qeveri nuk ka bërë asgjë përveçse ka shkaktuar grindje dhe e ka sjellë punën në atë pikë që të mos ketë asnjë institucion të vlefshëm përveç qeverisë.
Shqiptarët do jenë fatlumë nëse Piktori nuk sjell një vendim që ta shpallë veten mbret dhe Shqipërinë mbretëri,” tha ai.
“Në Shqipëri javën e kaluar u mbajt edhe mbledhja e përbashkët mes Shqipërisë dhe Kosovës dhe këto dy vende akoma nuk e kanë kuptuar se nuk kanë nevojë për mbledhje të përbashkëta qeverie, por kanë nevojë të kenë një qeveri të përbashkët. Por secili ka nevojë për Shqipërinë e tij,” theksoi Mehmeti.
Duke u ndalur te vendimi i qeverive për të ndihmuar Luginën e Preshevës, Mehmeti u bëri një thirrje miqve preshevarë që të bëjnë kujdes se ndihma e destinuar për ta, mund të vidhet.
“Si mund të shpresoni që mund t’ju ndihmojnë ata që nuk ndihmojnë qytetarët në vendet e tyre, jo më ata që janë jashtë,” tha Mehmeti.
