Gazetari Ylli Rakipi, në emisionin “Ilva Now” në Euronews Albania deklaroi se Presidenti Ilir Meta ka kapur momentin për të ndërhyrë në favor të LSI-së, duke parë dështimin e qeverisjes së Ramës dhe dobësinë e Lulzim Bashës.
Rakipi sqaron më tej, se që prej vitit 2008 ka pasur përpjekje të njëpasnjëshme, për të asgjësuar Ilir Metën dhe LSI-në, por tashmë Meta po luan për vete.
“Që nga viti 2008 e deri sot, e gjithë përpjeka ka qenë të mbahen dy banda të mëdha. Ka patur përpjekje të jashtëzakonshme për të mos hyrë askush në parlament dhe për të asgjësuar Ilir Metën dhe forcën e tij politike. Edi Rama kërkon mandatin e tretë, ai nuk mund të kthehet mbrapsht. E ka shumë të vështirë, duhet të paguajë rëndë nëse kthehet mbrapsht. Ai do të bëjë të gjithë përpjekjet dhe është në të drejtën e tij.
Edhe pse partia e Metës nuk ka qenë ajo që duhet të marrë pushtetin, ai e ka dominuar skenën politike shqiptare. Sigurisht Meta po punon edhe për vete dhe për partinë e tij politike. Meta e kupton në çfarë gjendje të vështirë ka arritur ky vend dhe e sheh momentin e rëndësishëm që mund të ndërhyjë.
Nga ana tjetër sheh edhe dobësinë e aleatit të vet, i cili që nga viti 2017 kur Rama e mashtroi në mënyrë amatoreske, përpiqet të përfitojë edhe në këtë plan, të pasigurisë. Meta po luan për vete, kundër të dy palëve dhe nesër mund të vendosë qeverinë, mund të marrë edhe maksimumin e mundshëm“, u shpreh Rakipi.
