Nga BoldNews.al
Operacioni i Prokurorisë së Tiranës, i konkretizuar me arrestimin e disa zyrtarëve të Agjencisë Kombëtare të Burimeve Natyrore (AKBN), ngre disa pikëpyetje, sidomos për kohën e gjatë të mbajtur në dorë ky hetim dhe, mbi të gjitha, për momentin kur u vendos të finalizohej.
Sipas të dhënave zyrtare, zyrtarët e AKBN-së, ish-drejtori i Operatorit të Sistemit të Transmetimit (OST), Klodian Gradeci dhe dy biznesmenët Naim Kasa dhe Isuf Berberi janë përfshirë në një skemë mashtruese me faturat për përdorimin e disa puseve të naftës, me një dëm ekonomik që përllogaritet në rreth 1.4 milionë dollarë.
Biznesmeni Ilir Berberi, aksioner i kompanisë së përfshirë në këtë skemë të dyshimtë mashtruese, “Phoenix Petroleum”, është i njohur për afërsinë e tij me Lëvizjen Socialiste për Integrim (LSI).
Berberi, së bashku me Gradecin, janë të vetmit, të cilët nuk janë arrestuar deri më tani. Të dhëna policore reforojnë se ata të dy janë larguar nga Shqipëria, pak orë para se të niste operacioni policor, duke ngritur dyshimet se ka pasur dekonspirim të operacionit.
Koha e gjatë e hetimit, goditja e një biznesmeni pranë LSI-së në momentin që fushata zgjedhore sapo ka ndezur motorët, si edhe fakti që ekzistojnë elementë të besueshëm që arrestimi i Isuf Berberit është dekonspiruar, krijojnë dyshime të forta se i gjithë operacioni ka pasur qëllime “politike”, krahas asaj penale.
Hetimi për këtë skemë mashtruese ka nisur në vitin 2016, bazuar në një material referuar nga Drejtoria e Përgjithshme e Doganave.
Prokuroria e Tiranës, siç deklaron vetë, ka kryer një seri verifikimesh, përfshirë edhe komunikimin me autoritetet amerikane, për disa fatura që kompania e Isuf Berberit kishte deklaruar se kishte kryer me një shoqëri në Shtetet e Bashkuara.
Të dhënat e prezantuara nga autoritetet hetimore janë të vetmet të publikuara deri më tani, në pritje të argumentave mbrojtëse nga personat nën hetim.
Megjithatë, fakti që hetimi është mbajtur 4 vjet në duar dhe u shfaq vetëm tani me “forcën e ligjit”, i jep krahë aludimeve se qëllimi i operacionit shkon përtej shkeljeve penale.
Për më tepër, duket se hetimi nuk ka pasur qëllim në vetëvete arrestimin e biznesmenit Isuf Berberi dhe ish-zyrtarit të lartë të Partisë Socialiste, Klodian Gradeci, por thjesht evidentimin e faktit se pronari i kompanisë në qendër të skemës së dyshuar mashtruese është i lidhur me Lëvizjen Socialiste për Integrim.
Në këtë linjë dyshimi shkon edhe fakti që Berberi dhe Gradeci janë larguar nga vendi pak orë para arrestimit, në drejtim të Turqisë, i vetmi korridor ajror i lejuar aktualisht për lëvizjen e qytetarëve shqiptarë, pas kufizimeve për shkak të pandemisë Covid-19.
