Kryeministri Edi Rama ka deklaruar se biznesi i vogël do të ketë 0 taksa. Premtimi, i bërë në prag të nisjes së fushatës elektorale, duket se është në vijim të propogandës qeveritare, e cila synon mandatin e tretë, edhe pse në 7 vitet e qeverisjes taksat janë shtuar dhe xhiro e bizneseve ka rënë.
PD, përmes ekspertit të ekonomisë Dorjan Teliti, ka publikuar një video ku përmblidhen reagimet e disa qytetarëve, që zotërojnë biznese të vogla dhe që tregojnë për vështirësitë që përballen çdo ditë.
Në 2013, Rama premtonte rilindje të bizneseve të vogla, por pas marrjes së mandatit të parë, gjithçka u harrua dhe situata degradoi. Taksat dhe kontrollet u shtuan, ndërsa çdo javë me qindra biznese deklaronin mbylljen e aktivitetit. Sot, kur kërkon mandatin e tretë si Kryeministër, Rama premton zero taksa për këto biznese.
“Për 7 vite, e vodhi dhe e zhvati biznesin e vogël dhe tani që nuk ka mbetur as gjysma e atyre që mbanin familjen me punë të ndershme, premton heqje taksash.
Rilindja e tepsisë ku ka ngrënë me garuzhde lugati që po tmerron të madh e të vogël, ka mbaruar!
Një vizion i ri dhe një plan afatgjatë do të jetë shpëtimi për biznesin e vogël.
Koha është në favor të qytetarëve!”, thuhet në reagimin lidhur me videon e publikuar.
