Oliver Varhely, Komisioneri për Zgjerim u shpreh se Komisioni Evropian ende nuk ka një datë për nisjen e Konferencës Ndërqeveritare me Shqipërinë dhe Maqedoninë e Veriut.
Por, ai shprehu besimin se ajo do të mbahet brenda presidencës gjermane, e cila përfundon në fund të dhjetorit.
Gjatë mbledhjes, të martën, me Komitetin e Punëve të Jashtme në Parlamentin Evropian, Varhely u shpreh se i kemi vendosur në tavolinë kuadrin ligjor të negociatave për të dyja vendet dhe tani Këshilli (KE) po i konsideron ato.
“Ne shpresojmë se shumë shpejt, me shumë shpresë nën këtë presidence (deri në fund të dhjetorit), të kemi dritën jeshile për hapjen e bisedimeve dhe të vazhdojmë më mbajtjen e Konferencës së Parë Ndërqeveritare me të dyja vendet”,tha Oliver Varhely.
Varhely do t’i dorëzojë të mërkurën, kryeministrit Rama, raport progresin e hartuar nga KE për Shqipërinë.
Komisioni Europian në progres raportin për Shqipërinë thekson se pa ngritjen e Gjykatës Kushtetuese nuk ka negociata.
Funksionimi i Gjykatës Kushtetuese duket se mbetet një nga kushtet e panegociueshme të Brukselit për Konferencën e Parë ndërqeveritare. Në progress raport theksohet se Shqipëria ka bërë përparim në këtë drejtim por plotësimi i vendeve vakante dhe funksionaliteti i Gjykatës Kushtetuese dhe Gjykatës së lartë mbetet një kusht që duhet plotësuar.
Sipas progres-raportit, Shqipëria në veçanti duhet të:
1. Avancojë më tej procesin e rivlerësimit të gjyqtarëve dhe prokurorëve; të sigurojë funksionimin e plotë të Gjykatës Kushtetuese dhe Gjykatës së Lartë;
2. Të miratojë masa efektive për të plotësuar vendet e lira të gjyqësorit me përparësi dhe për të vazhduar progresin në rekrutimin e gjyqtarëve të rinj
Në raport theksohet se pas kontradiktës mes institucioneve të Kuvendit dhe Presidentit për një vend vakant, Komisioni i Venecias ka dhënë një opinion mbi këtë çështje, duke siguruar udhëzimet e nevojshme për autoritetet shqiptare për të përfunduar emërimet e vendeve vakante në Gjykatën Kushtetuese.
