Presidenti Ilir Meta ka reaguar sërish për miratimin në Parlament të ndryshimeve në Kodin Zgjedhor, duke u shprehur se muri kriminal i “Rilindjes” do shembet në zgjedhjet e 25 Prillit.
“Shkatërrimi brutal i Marrëveshjes së 5 Qershorit ishte vetëdemaskimi i ‘Rilindjes’ si përfaqësuese e pakicës së pakicës apo thjesht oligarkisë dhe bandave. Populli shqiptar do të jetë në lartësinë që e kërkon ky moment historik për rrëzimin e murit kriminal të ‘Rilindjes’ që është vendosur nga dje në rrugën e integrimit europian. Ky mur do shembet nga tre milion shqiptarë në 25 Prill, por edhe më parë nëse është e domosdoshme. Shqipëria e Para! Shqipëria si gjithë Europa”, shkruan Meta në një postim në FB.
Në seancën e djeshme, mazhoranca dhe një pjesë e opozitës parlamentare bashkuan votat për të kaluar ndryshimet në Kodin Zgjedhor, që u kundërshtuan nga pjesa tjetër e opozitës parlamentare dhe asaj jashtëparlamentare.
