Komisioni i Pavarur i Kualifikimi shkarkoi nga detyra gjyqtarin e Tiranës, Neritan Cena. Vendimi nga trupa gjykuese e KPK-së e përbërë nga Roland Ilia, Firdes Shuli dhe Etleda Çiftja, u njoftua këtë të Martë.
Gjatë seancës dëgjimore të zhvilluar më herët gjatë javës, KPK vuri në dukje se Neritan Cena nuk justifikonte me burime të ligjshme një pjesë të pasurisë.
Neritan Cena ka përfunduar studimet e Magjistraturës në vitin 2005 dhe është emëruar gjyqtar në Gjykatën e Kurbinit. Në vitin 2006, ai u emërua në Gjykatën e Vlorës, ndërsa prej vitit 2010, ushtronte funksionin në Gjykatën e Tiranës. Cena ka qenë gjithashtu anëtar i Këshillit të Lartë të Drejtësisë.
