Shqipëria U21 nuk do të luajë miqësore me Slloveninë U21, pasi në këtë ekip ka lojtarë të prekur me COVID-19.
Federatat e Futbollit të dy vendeve kanë rënë dakord që ndeshja të mos zhvillohet dhe skuadra e Alban Bushit do të luajë kundër Apolonisë dhe Tiranës, më 8 dhe 10 tetor.
NJOFTIMI – “Anulohet miqësorja e ekipit Kombëtar Shpresa me Slloveninë, që ishte planifikuar të zhvillohej ditën e enjte datë 8 tetor ora 19:00 në stadiumin “Elbasan Arena”. Zyra e shtypit në FSHF bën me dije se disa prej lojtarëve të skuadrës së Sllovenisë U-21 kanë rezultuar pozitiv me COVID-19.
Si rrjedhojë, Federata Sllovene pas konsultave me FSHF-në ka vendosur, që skuadra të mos udhëtojë drejt Shqipërisë për miqësoren si masë paraprake për të ruajtur shëndetin e lojtarëve.
Pas anulimit të kësaj ndeshjeje, u vendos që Kombëtarja U-21 të luajë me Apoloninë më datë 8 tetor 2020 në ora 19:00 në stadiumin “Elbasan Arena”. Gjithashtu, është rënë dakord që ekipi Kombëtar Shpresa të zhvillojë edhe një miqësore tjetër të shtunën, datë 10 tetor ora 16:00 me Tiranën. Ky takim do të luhet në stadiumin Selman Stërmasi”, njofton FSHF.
