Gramoz Ruçi, kryetar i Kuvendit, i ka bërë sot shërbimin e rradhës Kryeministrit Edi Rama, lidhur me ndryshimet në Kodin Zgjedhor, të cilat jo vetëm nuk garantojnë hapjen e listave të kandidatëve, por ndalojnë edhe koalicionet parazgjedhore me lista të përbëra.
Ndryshimet në Kodin Zgjedhor të propozuara nga Partia Socialiste dhe një pjesë e asaj që njihet si “opozita” parlamentare kundërshtohen nga opozita e bashkuar dhe një pjesë e deputetëve.
Me ndryshimet e sotme, ndodh për herë të parë prej vitit 2003, që Kuvendi miraton në mënyrë të njëanshme Kodin e ri Zgjedhor. Herën e fundit kur në Kod u ndërhy pa konsensus ishte në vitin 2000-2001.
Por duket se kjo situatë nuk shqetëson aspak Kryeministrin Edi Rama, i cili edhe një ditë më parë paralajmëroi miratimin e Kodit të ri Zgjedhor, me një shumicë kushtetuese, çka nënkupton sigurimin e 84 votave të nevojshme, por jo konsensusin.
Dhe për ti ardhur në ndihmë Ramës sot u shfaq Ruçi, i cili në fjalën e mbajtur në Kuvend, tha se Parlamenti iu afrua maksimalisht propozimeve të palëve, dhe se socialistët më në fund po plotësojnë pritshmëritë e shqiptarëve.
“Miratimi sot i ndryshimeve në Kodin Zgjedhor dhe i institucioneve të reja të administrimit të zgjedhjeve do të ndikojë në mënyrë kapilare dhe pozitive në proceset zgjedhore të ardhshme në Shqipëri.
Me këto ndryshime, Kuvendi iu afrua maksimalisht, natyrisht aq sa e kishte të mundur, alternativave të forcave politike për ndërtimin legjislacionit e infrastrukturës zgjedhore që u shërbejnë zgjedhjeve të lira e të ndershme.
Kryesorja është se plotësuam pritshmëritë e qytetarëve shqiptarë, të cilët i kanë artikuluar qartë kërkesat për rregulla zgjedhore që nuk deformojnë e anashkalojnë, por garantojnë vullnetin e tyre”, tha Ruçi.
Në fakt, po ti referohesh deklaratave të mëparshme të Ramës për hapjen e listave të kandidatëce që mbështeten nga mbi 80 % e shqiptarëve, dhe projektit të propozuar nga PS që i mbyll edhe më shumë listat duke i dhënë të drejtën Kryetarit të partisë të përcaktojë renditjen, atëherë e gjitha çka thuhet për përmbushjen e pritshërive është propogandë.
Në vijim Ruçi foli për standartet perëndimore mbi të cilat mbështetet legjislacioni dhe institucionet e zgjedhjeve që do miratojë Kuvendi, që sipas tij janë të përcaktuara nga rekomandimet e Këshillit Europian dhe Bundestagut Gjerman.
Por prej ditësh ambasadorët e vendeve të BE, përfshi edhe ambasadorin gjerman, i janë drejtuar me apele të forta Kryesministrit Edi Rama që të respektojë marrëveshjen e 5 qershorit, duke mos i dhënë mbështetje ndryshimeve në mënyrë të njëanshme.
“Disa herë dhe për mjaft çështje, diferencat midis projekteve të opozitës parlamentare dhe asaj joparlamentare ishin më të mëdha sesa diferencat e tyre me projektet e shumicës qeverisëse.
Megjithatë, ju ftoj të shohim përpara. Ne as prisnim dhe as insistojmë të kemi konsensus politik për gjithshka. Në një republikë parlamentare, konsensusi i plotëdhe për gjithshka është vetëm një ideal, i cili në jetën reale realizohet si një konsensus parlamentar kushtetues.
Ligjet dhe vendimet që miratojmë sot nuk janë një produkt laboratori, por rezultat i një procesi politik e parlamentar real, që mbështetet në themele të forta kushtetuese”, tha Ruçi.
