Vjen reagimi i parë ndërkombëtar pas votimit të ndryshimeve në Kodin Zgjedhor. Përfaqësuesi për Politikën e Jashtme në Parlamentin Europian, eurodeputeti Michael Gahler, deklaron se shkelja e marrëveshjes së 5 Qershorit rrezikon të bllokojë dhe të shtyjë Konferencën e parë Ndërqeveritare si hapin e parë për fillimin e negociatave të pranimit në BE.
“Duke votuar sot shkeljen e Marrëveshjes së 5 Qershorit të negociuar nga Bashkimi Evropian me opozitën, kryeministri shqiptar Edi Rama hodhi një hije të errët mbi zgjedhjet e ardhshme të prillit, të cilat duhet të ishin të lira e të ndershme, dhe më të mira se të mëparshmet. Me këtë veprim Rama qartësisht pengon integrimin evropian të Shqipërisë. Më saktësisht, shkelja e marrëveshjes së 5 Qershorit rrezikon të bllokojë dhe të shtyjë Konferencën e parë Ndërqeveritare si hapin e parë për fillimin e negociatave të pranimit në BE. Shqipëria meriton shumë më mirë se kaq”, shprehet eurodeputeti gjerman në reagim.
Gahler i bën thirrje Presidentit t’i kthejë ligjin e sotëm Parlamentit dhe kryeministrit Rama të rishikojë qëndrimin e tij.
“Ne i bëjmë thirrje Presidentit t’i kthejë ligjin e sotëm Parlamentit. Ne i bëjmë thirrje Kryeministrit Rama të rishikojë pozicionin e tij për hir të së ardhmes evropiane të popullit shqiptar”, shtoi Gahler.
Deputetët e mazhorancës dhe një pjesë e ligjvënësve të opozitës parlamentare bashkuan votat këtë të Hënë për të miratuar ndryshimet e propozuara nga mazhoranca për Kodin Zgjedhor, por të padakordësuara me opozitën.
