Erjon Veliaj, kryebashkiak i Tiranës, ka nisur fushatën për zgjedhjet e 25 prillit, edhe pse zyrtarisht gjithçka duhet të nisë në mars.
Por nga momenti kur u caktua nga Edi Rama si drejtues politik në Bashkinë e Tiranës, të cilën e drejton edhe si kryebashkiak, Veliaj ka nisur fushatën.
Dhe në këtë proces ai nuk nguron të përdorë edhe stafin e tij, atë që paguhet me taksat e qytetarëve, jo për të bërë fushatë, por për të ofruar shërbime.
Një nga pjesëtaret e stafit të Veliajt në Bashki është edhe Valbona Selimllari, një ish-miss që më pas u angazhua në spektaklet televizive.
Ajo u shfaq në krah të Veliajt në Zall Bastar, ndërsa në media u nxitua të raportohet se një tjetër artiste apo emër i njohur i ekranit apo spektakleve mbështet PS-në. Në fakt prej kohësh Selimllare është emëruar si këshilltare e Erjon Veliajt në Bashki dhe shfaqja e saj në krah të drejtuesit politik, njëheraz edhe Kryebashkiak, nuk është aspak e çuditshme.
Thjesht ajo pohoi në publik mbështetjen për partinë ku sot militon Veliaj, të cilin e këshillon si Kryebashkiak.
“Tek Partia Socialiste jam sepse ne kemi një thënie nga Përmeti. Unë jam përmetare me origjinë dhe themi: Ai djali dhe ajo vajza po janë punëmbaruar dhe kjo fjalë më ka mbetur gjithmonë në mendje se ma thoshte gjyshi dhe nëna: “Punëmbaruari është gjithmonë i suksesshëm” dhe në fakt unë jam me punëmbaruarit, sepse për hir të së vërtetës nuk kemi kohë të humbim me ata që s’mbarojnë punë.”- u shpreh Selimllari.
Në fakt nuk është hera e parë kur artistë, këngëtare apo personazhe të spektakleve janë angazhuar në jetën politike. Ato janë përdorur në periudha të caktuara, por asnjë prej tyre nuk ka pasur karrierë të sukseshme. Thjesht ato kanë luajtur një rol, kanë tërhequr vëmendje mediatike dhe më pas, kanë humbur shkëlqimin.
