Kryeredaktorja e portalit investigativ rus “Kosa Press” është vetvrarë të premten duke i vendosur flakën vetes para drejtorisë së policisë së qytetit industrial Nishni Novgorod, afër 400 kilometra në lindje të Moskës.
Irina Slavina ndodhej nën presionin masiv të autoriteteve dhe vetëvrasjen e kishte paralajmëruar përmes një statusi në rrjetin social “Facebook”.
“Bëni Federatën Ruse përgjegjëse për vdekjen time”, shkroi të enjten Slavina. Ajo gjithashtu shkroi se policia dhe përfaqësues nga autoritetet kishin bastisur apartamentin e saj duke kërkuar të dhëna për lidhje të mundshme të saj me lëvizjen opozitare, Open Russia, e themeluar në ekzil nga kritiku i Kremlinit, Mihail Kodorkovski. Policia konfiskoi kompjuterin e saj dhe celularët edhe të bashkëshortit dhe vajzës.
Vetëvrasja e kryeredaktores ruse ka shkaktuar mjaft reagime. Kritiku i Kremlinit, Aleksej Navalny e cilësoi vdekjen e Slavinas të tmerrshme. “Akuzat kundër saj janë të fabrikuara. Ata e kanë çuar atë në vetëvrasje”, tha Navalny.
