Kreu demokrat Lulzim Basha tha mbrëmjen e sotme se është i gatshëm në çdo moment të bëjë një debat publik me Kryeministrin Edi Rama.
Basha tha se Rama ka frikë nga debatet, ndërsa shtoi se ai ka prej vitit 2000 që i shmanget debateve publike.
“Ka urdhëruar madje që mos ketë debate as mes pvrfaqësuesve të tij dhe të opozitës. Po çfarë është debati? Është transparencë dhe Edi Rama ka frikë nga transparenca, pasi ai funksionon me regji qendrore”, tha Basha.
Ai tha se Edi Rama ka marrë të gjitha pushtetet, duke shtuar se kjo duhet të frenohet.
“Duhen ose dy dhoma në Parlament ose procedura më transparente në funksionimin e Parlamentit. Personalisht do të preferoja dy dhoma”, tha Basha.
Lidhur me listat e hapura, Basha tha se ka një propozim konkret me renditje alfabetike të kandidatëve dhe kush merr më shumë vota, merr mandatin e deputetit.
“Jam për sistem mazhoritar me 100 zona që zgjidhen drejtpërdrejtë nga populli dhe 40 senatorë që zgjidhen po drejtpërdrejtë nga populli”, tha Basha.
