Nga Boldnews.al
Shtetasit I.M, B.K, F.SH janë të dëmtuar financiarisht nga Fotaq Semi, i cili po vuan dënimin me 10 vjet burgim të dhënë nga nga gjykata e Tiranës për “Mashtrim me pasoja të rënda”.
Njëri prej tyre, I.M., ka denoncuar së fundmi një tentativë korrupsioni në Gjykatën e Apelit të kryeqytetit, me qëllim shpalljen e tij të pafajshëm dhe lirimin nga burgu të të dënuarit Semi.
Fotaq Semi është dënuar nga shkalla e parë në vitin 2017, pasi prokuroria e Tiranës provoi se ai kishte mashtruar disa persona, me një vlerë rreth 1 milionë euro.
Çështja e tij tashmë pritet të shqyrtohet në Gjykatën e Apelit, prej trupës së përbërë nga Valdete Hoxha, Shkëlqim Mustafa dhe Genti Shala.
I.M., deklaron se ka siguruar të dhëna, sipas të cilave familjarët e dënuarit Fotaq Semi “e kanë rregulluar me gjykatën” për lirimin e tij.
Këto të dhëna, I.M. i ka renditur në një kallëzim drejtuar Prokurorisë së Tiranës, në të cilin denoncon për kanosje shtetasin I.A, një mik i familjes Semi, i cili, sipas denoncimit, i ka rrëfyer më parë edhe për “ndërhyrjen pranë Gjykatës”, para se ta kërcënonte që të mos afrohej “as tek dera e Gjykatës së Apelit”.
Krahas kallëzimit penal, i dëmtuari I.M, ka dorëzuar edhe një kërkesë për përjashtimin e trupës gjykuese të Apelit, me argumentin se ekzistojnë dyshime se ata mund të jenë të njëanshëm në çështjen kundër Fotaq Semit, e përfaqësuar në gjykatë nga prokurorja Arta Marku.
Për më tepër, njëri prej gjyqtarëve për të cilët kërkohet përjashtimi, Shkëlqim Mustafa, rezulton të ketë qenë pjesë e trupës gjykuese në një proces të mëparshëm, ku, i kallëzuari aktual për “Kanosjes”, shtetasi I.A, është shpallur i pafajshëm në gjykatën e Apelit, pasi më herët gjykata e shkallës së parë e kishte dënuar me 12 vjet burgim për “Mashtrim”.
Denoncimi
Në Janar të vitit 2020, i dëmtuari I.M. kontaktohet nga shtetasi I.A, i cili i thotë se është gjetur mundësia që të ktheheshin paratë që Fotaq Semi i kishte marrë disa vite më parë dhe për të cilat ishte dënuar për “Mashtrim”.
“Ndërmjetësi” I.A. i ka thënë të dëmtuarit se kishte ardhur në emër të familjes së Fotaq Semit dhe i siguroi një takim ndërmjet tyre.
Në atë takim, familjarët e Semit i kanë deklaruar të dëmtuarit se do t’i kthenin para, fillimisht një pjesë dhe të tjerat me këste.
Një muaj më pas, një person nga familja Semi e takon sërish të dëmtuarin, duke i shprehur të njëjtën gjë, se paratë do t’i merrte.
Ndërsa, i pyetur lidhur me rolin e “ndërmjetësit” I.A, familjari i Semit ka deklaruar se kanë raport të ngushta biznesi, duke lënë të kuptohet se paratë që Fotaq Semi i kishte marrë të dëmtuarit dhe personave të tjerë, mund t’i kishte përdorur pikërisht me I.A
Për disa kohë, nuk pati asnjë lëvizje, ndërkohë që i dëmtuari I.M. konstatoi se familja Semi po mundohej të fitonte kohë derisa çështja e të dënuarit të merrte zgjidhje në Gjykatën e Apelit.
Në muajin Korrik 2020, “ndërmjetësi” I.A. e ka kontaktuar për herë të fundit të dëmtuarit I.M. “Ndërmjetësi” I.A, siç deklaron i dëmtuari në kallëzim, i është shprehur se “Nëse do lekët e tua, mos u paraqit në gjykatë, madje, as te dera e saj”.
Përballë kësaj shprehjeje, i dëmtuari I.M i është drejtuar bashkëbiseduesit nëse “po e kërcënonte”.
“Ndërmjetësi” I.A i është drejtuar se “kështu më ka thënë familja Semi të të them”.
Në vijim, siç thuhet në kallëzim, “ndërmjetësi” I.A. i ka thënë të dëmtuarit se “ne e kemi mbyllur çështjen në gjykatë bile bile nje nga gjyqetaret eshte miku im. Avokati ka biseduar me dy gjyqtaret e tjere dhe ai (Fotaq Semi) ka marrë disa raporte mjekësore. Ti nuk ke ndonjë humbje që të dali ai i pafajshëm, pasi ai do të marrë lekët dhe do të të japë edhe ty borxhin”.
Në kallëzimin e dorëzuar para oficerëve të Policisë Gjyqësore, i dëmtuari I.M ka ngritur dyshimet se ai është gjendur në një skemë mashtrimi dhe kërcënimi, me qëllim që të mos paraqitet në Gjykatën e Apelit.
Gjithnjë sipas kallëzimit penal, në datën 14 Shtator 2020, ditën kur Gjykata e Apelit po zhvillonte një seancë me Fotaq Semin, një person i është afruar në rrugë të dëmtuarit I.M. dhe e ka kërcënuar “Mos guxo të afrohesh tek gjykata”.
Megjithë këtë kërcënim, I.M është paraqitur në Gjykatën e Apelit dhe më tej ka dorëzuar kallëzimin penal ndaj shtetasit I.A dhe familjarëve të Fotaq Semit, për veprat penale të “Kanosjes” dhe “Kanosje për të mos kallëzuar”.
“Boldnews.al” kontaktoi kallëzuesin I.M., i cili tha se disponon prova, të cilat hedhin dritë mbi një skandal të madh, ku janë përfshirë eksponentë të rëndësishëm të sistemit të drejtësisë.
DENONCO