Ambasadori i BE-së në Tiranë, Luigi Soreca, i ka bërë thirrje klasës politike, që të respektojë marrëveshjen e 5 qershorit, siç u firmos.
Soreca përmes një postimi në rrjetet sociale thekson se çdo propozim për ndryshime të mëtejshme në nenet e kodit zgjedhor, të cilat shkojnë përtej fushëveprimit të marrëveshjes së 5 qershorit, diskutohen si duhet në kuadrin e Këshillit Politik në një mënyrë bashkëpunuese dhe gjithëpërfshirëse përpara se të votohet në Parlament.
Reagimi i ambasadorit të BE vjen në një kohë kur nga Kuvendi ka nisur procedura për diskutimin mbi Kodin Zgjedhor dhe implementimet e ndryshimeve Kushtetuese të miratuara më 30 korrik.
Debatet mes palëve kanë të bëjnë me formulën që do të aplikohet lidhur me koalicionet. Në mënyrë të njëanshme, socialistët e drejtuar nga Edi Rama po tentojnë të aplikojnë një formulë të re, ku në rastet e koalicioneve, partitë duhet të dalin me një listë të përbashkët kandidatësh. Opozita e bashkuar e drejtuar nga PD propozon që të mbahet në fuqi formula e aplikuar prej vitit 2003.
“Ne përsërisim qëndrimin tonë që marrëveshja e 5 qershorit, e cila ka zbatuar rekomandimet e OSBE / ODHIR mbi # reformën zgjedhore, duhet të respektohet. Ne gjithashtu konfirmojmë rëndësinë që çdo propozim për ndryshime të mëtejshme në nenet e kodit zgjedhor, të cilat shkojnë përtej fushëveprimit të marrëveshjes së 5 qershorit, diskutohen si duhet në kuadrin e Këshillit Politik në një mënyrë bashkëpunuese dhe gjithëpërfshirëse përpara se të votohet në Parlament”, shprehet Soreca.
