Policia e Tiranës arrestoi një 30-vjeçar, për shpërndarje narkotikësh në qendër të kryeqytetit, ndërsa procedoi penalisht edhe një nga klientët.
Policia njoftoi se në operacionin e koduar “Zona” u arrestua 30-vjeçari E.M, banues në Tiranë, posedues dhe shpërndarës i lëndës narkotike si dhe u procedua në gjendje të lire, klienti M.P.
Nga Seksioni për Hetimin e Narkotikëve është marrë informacion në rrugë operative se E. M. posedonte lëndë narkotike dhe merrej me shpërndarjen e saj në zonën e “Myslym Shyrit”, Tiranë.
Mbi bazën e këtyre informacioneve, policia ka nisur kontrollet tek “Myslym Shyri”, ku mbrapa një karburanti ka konstatuar E. M, duke i shitur lëndë narkotike M.P.
Në vijim, Policia gjeti të fshehur në hyrje të një pallati një sasi dozash me lëndë narkotike dhe gjatë kontrollit të banesës i gjeti edhe një sasi tjetër lënde narkotike gati për ta ndarë në doza, gjithsej 720 gramë kanabis.
Dosja e tij i kaluan Prokurorisë pranë Gjykatës së Shkallës së Parë Tiranë, për veprime të mëtejshme hetimore.
