Kryeministri Edi Rama, në takimet me drejtuesit politikë sipas qarqeve, deputetët apo Kryebashkiakët e PS-së, ka vendosur si objektiv marrjen e 74 mandateve në zgjedhjet e 25 prillit.
Madje nga raportimet, Rama ka kërkuar angazhimin e çdo drejtuesi sociialist apo Rilindas në arritjen e këtij objektivi, duke kaluar në sitë drejtuesit e institucioneve lokale, që nga ana e tyre, po shpërndajnë formularë te vartësit për të plotësuar të dhënat, duke filluar me numrat e kartave të identitetit.
Por shifra 74 e përcaktuar nga Rama si objektiv, duket e paarritshme edhe nga vetë deputetë dhe ish-ministra të tij.
Menjëherë pasi në media u publikua ky objektiv, nuk kanë munguar reagimet. Mjaft prej deputetëve janë shprehur se mandati i tretë synon kapjen e mandateve që do të garantojnë PS të qeverisë e vetme.
Ilir Beqja, ish-ministër i Shëndetësisë në qeverinë Rama1, në një intervistë për SCAN, ka ulur pak objektivin, duke u shprehur se PS synon të marrë mbi 70 mandate.
“Mbi 70 mandate që Edi Rama të marrë një mandate të tretë dhe të formojë një qeveri socialiste. Dhe ta formojë qeverinë me një mazhorancë të pastër socialiste”, shprehet Beqaj.
Ndoshta dikush mund të thotë se 74 është mbi 70 dhe s´ka vend për debate. Por, ndoshta vetë socialistët duke e konsideruar shifrën 74 si të paarritshme, mund të kënaqen edhe me 70. Dhe kjo ndodh vetëm pak ditë pasi Rama përcaktoi objektivin. Në javët në vijim edhe shifra 70 mund të duket e paarritshme dhe ajo të vijojë të ulet.
