“Së shpejti bluzat e bardha do të kenë rritjen më të madhe të pagave në historinë e tyre”, ka deklaruar kryeministri Edi Rama në një postim në rrjetet sociale.
Ai shprehet se në Tiranë deri në zonat më të thella, më shumë se 600 mjekë dhe 2400 infermierë i janë bashkuar sistemit shëndetësor publik në 2 vitet e fundit, falë procesit transparent të përzgjedhjes.
“Me këtë të dhënë të thjeshtë, ku shihet se si nga qendrat shëndetësore në zonat më të thella në spitalet në zemër të Tiranës, më shumë se 600 mjekë dhe mbi 2400 infermierë, janë bërë pjesë e sistemit shëndetësor publik vetëm 2 vitet e fundit, falë një procesi transparent përzgjedhjeje përmes platformave digjitale, jashtë politikës e tarafeve që e mbajtën peng për çerekshekulli shëndetësinë tonë dhe gjithashtu me lajmin e mirë për ta e kolegët e tyre, se shumë shpejt të gjitha bluzat e bardha do të kenë rritjen më të madhe të pagave në historinë e tyre, ju uroj një ditë të mbarë”, shkruan Rama.
Duket se vendimi për rritjen e pagave për mjekë e infermierë, por edhe mësues, sikundër ka deklaruar më parë Kryeministri, është një premtim elektoral, që bëhet 7 muaj para zgjedhjeve të ardhshme parlamentare. Kjo për faktin se në 8 vitet e qeverisjes së Ramës, pagat në administratën publike nuk janë rritur, ndërsa tashmë në fund të mandatit të dytë, Kryeministri pretendon t´ia rrisë me rreth 40 %.
Pak kohë më parë Rama u sfidua publikisht nga një mjek, i cili po përmes rrjeteve sociale, i kërkoi Kreut të Qeverisë, që të miratonte vendimin për rritjen e pagave dhe jo të premtonte se do i rriste ato.
