Lirohet nga qelia këngëtarja Fjolla Morina, e cila gjatë fundjavës u arrestua në pikën kufitare të Morinës, pasi në çantën e dorës iu gjet një pistoletë.
Ndërkohë, janë lënë në qeli dy personat e tjerë të cilët ishin në makinë me këngëtaren 34-vjeçare, në momentin e ndalimit të mjetit nga policia: biznesmeni Fysnik Syla dhe Fitim Muji. Sipas dëshmisë së këngëtares dhënë në polici, i pari është një mik i saji, ndërsa i dyti shoferi i Morinës.
Momenti i shoqërimit në gjykatë
Pas përfundimit të seancës, avokati i këngëtares tha se gjykata dha masën e sigurisë arrest në shtëpi për Morinën, pa garanci pasurore. Sipas vendimit të gjykatës, këngëtarja nga Prishtina duhet të vendoset në një banesë në Kukës, deri sa të sqarohen hetimet.
Ndërsa për dy të akuzuarit e tjerë, gjykata e Kukësit vendosi masën e arrestit me burg për një muaj. Kohë kjo e nevojshme derisa të dalin rezultatet e ekspertizës, për të zbuluar nëse ka gjurmë të gishtërinjve të tyre në armën e gjetur në çantën e këngëtares.
Akuza që është ngritur ndaj të akuzuarve është ajo e trafikimit të armëve. Ndërkaq, avokati, në një prononcim për gazetarët pas seancës, hodhi poshtë akuzën. Ai tha se s’kemi të bëjmë me trafik armësh dhe municionesh. “Madje s’kemi të bëjmë me armë luftarake, jo në sasi, po dhe në cilësi. Është një armë që mund ta blini për 50 euro kudo”, tha ai.
Ai paralajmëroi apelim të vendimit.
“Shtatzënia” shtyn vendimin
Këngëtarja dhe dy të akuzuarit e tjerë u paraqitën në sallën e gjyqit gjatë paradites, ku avokati deklaroi se kishte dyshime që Fjolla Morina ishte shtatzënë.
Në këto kushte, u vendos nga gjykata që të shtyhej dhënia e vendimit për masën e sigurisë, me qëllim që të verifikohej nëse 34-vjeçarja ishte apo ajo shtatzënë. Kjo, pasi fakti do të ndikonte në verdiktin e gjykatës.
Seanca u ndërpre me qëllim kryerjen e kontrolleve mjekësore për të rifilluar rreth orës 13:20. Kontrollet mjekësore zbuluan se Fjolla Morina nuk ishte shtatzënë.
/BN/
