E shantazhonte me foto intime për para/ Ajo e fut në kurth dhe i riu përfundon në pranga

Një person është arrestuar dhe një tjetër është shpallur në kërkim nga ana e policisë së Tiranës pasi shantazhonin nëpërmjet fotove një të re. Në pranga ra Afrim Kurti ndërsa në kërkim u shpall Defrim Kurti, kushëri me të arrestuarin.

Vajza që shantazhohej ishte e dashura e Afrim Kurtit. Ai dispononte foto intime të saj me të cilat e shtantazhonte për përfitim financiar.

E vënë në këto kushte vajza ka referuar rastin në polici dhe ka futur në kurth Afrimin, duke i lënë takim për ti dhënë paratë që i kërkonte por ky takim do përfundonte me arrestimin e tij.

Në kërkim u shpall kushëriri i tij Defrim Kurti, i cili dyshohet se është i përfshirë gjithashtu në këtë shantazh.

“Nga Sektori për Hetimin e Krimeve të Rënda ndaj Jetës dhe Pronës u bë arrestimi në flagrancë i  shtetasit me iniciale A. K., 18 vjeç, si dhe u referuan materialet në Prokurorinë pranë Gjykatës së Shkallës Parë Tiranë, për shtetasin në kërkim me iniciale D. K, 30 vjeç, pasi në bashkëpunim kanë shtrënguar me anë të kanosjes dhe dhunës për dhënie pasurie, një shtetase, me qëllim t’i përvetësonin shumën prej 15.000 lekësh të reja, për mospublikimin e fotove të saja në rrjetet sociale” njoftoi policia.

Materialet i kaluan Prokurorisë së Rrethit Gjyqësor Tiranë, për veprime të mëtejshme, shtuan të njëjtat burime.