Përfaqësuesi i mazhorancës në Këshillin Politik, Damian Gjiknuri, ka folur në Fax News për propozimin e PS në lidhje me ndryshimet në kodin zgjedhor. Gjiknuri zbuloi se PS ka propozuar që të jetë vetëm një fletë votimi për zgjedhjet e 25 Prillit ku qytetari mund të zgjedhë për partinë dhe kandidatin që i përket partisë apo koalicionit.
“Fleta e votimit është çështje teknike, e zgjidh KQZ. Në votime, parimet janë vendosur aty. Si do të votojë qytetari? Një votë e ka në një fletë votimi dhe ne mendojmë që duhet të jetë një fletë votimi për ta pasur procesin e thjeshtë. Në një fletë votimi, qytetari do të votojë partinë politike që zgjedh, i vë kryqin asaj ose koalicionin parazgjedhor dhe vota tjetër përdoret për emrin.
Pra do të thotë që mund të zgjedhin një kandidat të Partisë Socialiste nëse ka votuar për PS dhe mund të zgjedhin një kandidat të PD apo LSI nëse ka votuar për koalicionin e djathtë. Pra qytetari do të bëjë dy zgjedhje, partinë dhe emrin e kandidatit. Kjo realizon dhe qëllimin që ka Kushtetuta, konkurron partitë por zgjedhësi ka të drejtë ti japë votë parapëlqyese dhe të rirendisi listën e forcës politike. Këtë synon sistemi”, shpjegoi Gjiknuri.
Ndër të tjera, shpjegoi se renditjen do ta bëjë partia ose kryetari në mënyrë që të përfitojnë kandidatët më shumë të votuar, por pa prekur vendin e grave. Sipas Gjiknurit, edhe ata që nuk do të zgjidhen, do të renditen në bazë të votave dhe në rastin e një vakance, zgjidhet i pari me numrin më të lartë të votave.
“Në një qark që mund të ketë 10 mandate, një parti fiton 5 mandate. Merret vota mesatare e partisë dhe votat mesatare të partisë janë ato që kanë hedhur qoftë vota që llogaritet për partinë apo kandidatin së bashku me partinë, pjesëtohet me numrin e mandateve dhe del një kuotë.
Çdo kandidat që rezulton të ketë marrë një votë më shumë se mesatarja e partisë, automatikisht zëvendëson atë që është i fundit. Nëse janë 5 mandate, ai që është i pesti zë vendin. Nëse është nga gjinia më pak e përfaqësuar, ky nuk zë vendin e një gruaje por shkon tek ai numri që është më sipër dhe ka më pak vota. Do të thotë që bëhet rirenditje.
Partitë me listat e tyre do të përfshijnë kandidatë që vërtetë kanë vota. Nga ana tjetër, edhe këta që nuk zgjidhen, renditet ai që ka më shumë vota dhe nesër kur krijohet një vakancë, ky është i pari që zë vendin pas rirenditjes në bazë të votave. Pra kjo është një formulë vërtetë e mirë”, tha Gjiknuri për Fax News.
