Kandidatët për deputet, ja kur votohen nga anëtarësia e PD/ Procesi nis me Kukësin, Dibrën e Shkodrën

Anëtarët e Partisë Demokratike do të nisin procesin e votimit të kandidatëve për deputet, proces i cili shënon edhe fazën e dytë të përzgjedhjes.

Emrat e kualifikuar nga Komisioni i Vlerësimit të Kandidatëve, do t’i nënshtrohen votimit nga anëtarësia. Referuar një udhëzimi të kreut demokrat Lulzim Basha, anëtarët e PD do të shprehen me votë kontestuese, pra kandidatët që marrin më shumë vota renditen të fundit.

Sekretari i Përgjithshëm i PD Gazment Bardhi i ka dërguar një shkresë degëve lokale të PD në Kukës, Dibër e Shkodër.

Bardhi jep udhëzimet për përzgjedhjen e kandidatëve për deputetë, ndërsa njofton strukturat se do të votojnë për të zgjedhur kandidatët për deputetë më datë 25 shtator në Kukës, 26 në Dibër, 30 shtator në Shkodër, nga ora 10.00 – 18.00.

LEXO EDHE  Kodi Zgjedhor të Enjten në Kuvend/ Pollo: Rama refuzoi Várhelyi, konfrontim i hapur me Brukselin

Lista me emrat e kandidatëve duhet të përgatitet dhe të shpallet nga dega e PD lokale jo më vonë se 24 orë para ditës së zgjedhjeve.

Secili kandidat përpara procesit të konsultimit me anëtarësinë duhet të nënshkruajë një deklaratë personale ku merr përsipër përgjegjësinë që të mos përfshihet në praktika të ndaluara që dëmtojnë garën e lirë, të ndershme dhe të barabartë brenda partisë sipas Formatit të miratuar.

Cilido kandidat që do të shkelë këto rregulla, do të skualifikohet nga lista e kandidatëve që do të konfirmohen nga anëtarësia dhe më pas do i dërgohen Kryesisë.