Vrasja në Durrës/ Pesë të arrestuar dhe tre në kërkim, akuzat (VIDEO)

Pesë persona janë arrestuar lidhur me ngjarjen e djeshme në Durrës ku Armando Baboçi u vra dhe dy të tjerë u plagosën.

Tre nga të arrestuarit janë Klodjan Daci, Henri Tatasi dhe Sergio Tatasi. Dyshohet se konflikti mes dy palëve nisi fillimisht në ambientet e një lokali në lagjen nr.13, në zonën e Plazhit, e më pas u zhvendos në rrugë, ku përveç përdorimit të sendeve të forta, pati dhe të shtëna me armë zjarri. Ka qenë Klodjan Daci i cili ka qëlluar me armë babë e bir, Armando Baboçi dhe Erald Gjini. Baboçi mori një plumb në bark, e për pasojë ndërroi jetë, e ndërsa djali është plagosur në dorë, jashtë rrezikut për jetën. Ndërkohë, si pasojë e sherrit ka shkuar në spital dhe një 23-vjeçar me inicialet H.T..

Pas të shtënave, autorëve tentuan të largohen me një autimjet tip “Alfa Romeo”, por u ndaluan nga një postbllok policie.

Dyshohet se konflikti nisi për motive banale.

Arrestimet

Klodjan Daci, 20 vjeç, Henri Tatasi, 23 vjeç dhe Sergio Tatasi, 20 vjeç, banues në Durrës, u arrestuan, njoftoi policia.

“Arrestimi i tyre u bë pasi më datë 18.09.2020, rreth orës 20:00, në lagjen nr.13, Plazh, Durrës, pas një konflikti të çastit për motive të dobëta, me mjete të forta e më pas me armë zjarri kanë mbetur të plagosur shtetasit Erald Gjini, 19 vjeç, H.T., 23 vjeç, të cilët ndodhen në spital nën kujdesin e mjekëve si dhe shtetasi Armando Baboçi (Gjini)., 39 vjeç, i cili si pasojë e plagëve të marra ndërroi jetë në Spitalin Rajonal Durrës”, shtuan të njëjtat burime.

Në pranga për moskallëzim krimi u vunë dhe Endri Cimo (Bregu) dhe Argit Kastrioti, 24 vjeç, banues në Durrës, ndërsa në kërkim policor janë dhe tre persona të tjerë.

Janë sekuestruar në cilësinë e provës materiale 3 automjete, 4 aparate celular si dhe pamje filmike në interes të zbardhjes dhe dokumentimit të plotë të ngjarjes.

Akuzat

Materialet i kaluan Prokurorisë së Rrethit Durrës, në ngarkim të shtetasve Klodjan Daci, Henri Tatasi dhe Sergio Tatasi, për veprat penale “Vrasja me paramendim” kryer në bashkëpunim, “Armëmbajtje pa leje”  dhe në ngarkim të shtetasve Endri Cimo, Argit Kastrioti, për veprën penale “Moskallëzim krimi”, njoftoi policia e Durrësit.