Partia Agrare Ambientaliste, pjesë e koalicionit të drejtuar nga PD, e cilëson vendimin e Edi Ramës për të ndaluar koalicionin si një qëndrim diktatorial.
Në një deklaratë për mediat, PAA kërkon nga partnerët ndërkombëtarë që të ndërhyjnë.
“PAA i drejtohet partnerëve strategjikë të vendit tonë SHBA dhe BE, organizatave ndërkombëtare si OSBE-ODHIR, presidentit të Republikës, kryetarit të Kuvendit, por edhe opinionit publik për të eleminuar pengesat dhe vonesat e qëllimshme qe Rama po i bën zgjedhjeve parlamentare të lira dhe të ndershme 2021.
Është fatkeqësi kombëtare që Rama po bllokon dhe vonon në mënyrë të përsëritur përmbushjen e 15 kushteve për çeljen e negociatave me BE. Është shenjë e qartë e qëndrimit autokratik dhe anti-europian i Ramës, bllokimi prej tij disa herë i procesit të integrimit të vendit nga Ruzhdia 2009 deri sot në Rilindja 2020”, thuhet në reagimin e PAA.
Në vijim theksohet se në asnjë vend partitë politike nuk bllokohen me ligj se si do ti formojnë koalicionet e tyre.
“Koalicionet njihen si subjekte elektorale në çdo demokraci funksionale. Forma dhe përzgjedhjet konkrete duhet të jenë në liri të plotë të partive politike se me kë do të konkurrojnë. Çdo alibi tjetër është thjesht një provë e qartë e mentalitetit neo-diktatorial. Rama e ka më kollaj të përkushtohet për lobim personal nëpër Euro-Azi se sa të lehtësojë zgjedhjet e lira dhe të ndershme në Shqipëri. Rama e ndjen derën e përplasur në fytyrë nga shumë kancelari europiane për promovimin e kriminelëve në politikë dhe vjedhjen e votave”, thekson PPA e Agron Dukës.
Ndërsa shqiptarët kanë mbetur të fundit për një demokraci funksionale, PAA shprehet se Rama është renditur i pari jo vetëm në Europë për bllokimin e zgjedhjeve të lira dhe të ndershme, për promovimin e kriminelëve në mandate politike, për vjedhjen e votave dhe për korrupsionin epidemik dhe kapjen e shtetit.
