Raportuesi për Lirinë e Medies dhe Mbrojtjen e Gazetarëve në Asamblenë Parlamentare të Këshillit të Evropës (PACE), Stefan Schennach, ka shprehur sot shqetësimin e tij serioz në lidhje me ndryshimet që Parlamenti i Shqipërisë mund të miratojë lidhur me një numër ndryshimesh në legjislacionin aktual që synojnë mediet online.
Ndryshime të tilla pritet të ndërmerren pavarësisht kritikave të ashpra ndërkombëtare, duke përfshirë organizatat e lirisë së medies dhe Komisionin e Venecias të Këshillit të Evropës.
“Legjislacioni i propozuar nga Kryeministri shqiptar si një ‘paketë anti-shpifje’ synon të krijojë një organ administrativ që do të fuqizohet dhe do të urdhërojë mediet të heqin raportimet dhe lajmet për çështje të tilla si ‘cenimi i dinjitetit të individëve’, nën kërcënimin të gjobave të rënda. Është e qartë se një ligj i tillë mund të ketë një efekt tronditës mbi lirinë e medies për shkak të kushteve të tij të gjera.
Unë i referohem Opinionit të Komisionit të Venecias Nr. 980/2020 të datës 19 qershor 2020, i cili thotë qartë se ligji vuan nga paqartësia dhe do të ketë të ngjarë të ketë një” efekt ftohës”, duke shtypur diskutimin e lirë dhe fjalën politike në internet në Shqipëri. Unë ndaj mendimin e Komisionit të Venecias se teksti i projekt-amendamenteve, nëse nuk rishikohet shumë, rrezikon t’i bëjë më shumë dëm sesa dobi lirisë së shprehjes në Shqipëri, për sa i përket medieve në internet”, tha Schennach.
Ai nxiti Parlamentin shqiptar të heqë dorë nga propozimet aktuale dhe të rifillojë të gjithë procesin.
