50-vjeçari Bujar Çela mësohet se është ekzekutuar nga katër persona, të cilët sipas të dhënave të para dhe dëshmive, kanë qëlluar të katërt në të njëjtën kohë.
Ata e kanë ruajtur prej kohësh Çelën dhe e ekzekutuan sapo ai u ul për të pirë kafen e mëngjesit, në Bradashesh.
Mësohet se forcat RENEA të mbështetura nga policia e Elbasanit janë vënë në kërkim të autorëve, duke pasur parasysh edhe të kaluarën e errët të familjes Çela. Tashmë janë ngritur pistat, por policia ende nuk ka dalë me një njoftim të detajuar, duke u mjaftuar vetëm me deklaratën e komisariatit të Elbasanit, bërë në orët e para të mëngjesit, fill pas ngjarjes.
Çela, i cili punonte si taksist, u qëllua pasi doli nga makina dhe u ul në një lokal të pinte kafen e mëngjesit.
Një mjet tip ‘Renault’, që dyshohet se u përket autorëve, u gjet e djegur në fshatin Murras.
Nga të dhënat e deritanishme të ngjarjes, dyshimet e hetuesve janë se kemi të bëjmë me një atentat të mirë menduar. Një nga pistat e hetimet është se krimi ka ndodhur në vazhdën e konflikteve të autorëve me vëllanë e viktimës.
Bujar Çela është vëllai i Talo Çelës, aktualisht në kërkim për grabitjen në Rinas dhe vrasje.
FOTO/ Kush është Talo Çela, autori i dyshuar i disa vrasjeve në Elbasan dhe grabitjes në Rinas
Lidhur me ngjarjen, foli për mediat pronari i lokalit, ku u qëllua Çela, i cili tha se ishte në në banak kur dëgjoi të shtëna dhe pasi doli në pjesën e jashtme të biznesit, pa trupin e pajetë të 50-vjeçarit.
“Unë isha prapa banakut. Dëgjova krismat kur ndodhi ngjarja, dola dhe pashë që u larguan”, tha pronari i lokali.
