Mëngjesin e kësaj të enjte, Elbasani tronditet nga një vrasje. Ngjarja ndodhi një ditë pasi në këtë qytet ishte ministri i brendshëm Sandër Lleshaj dhe Taulant Balla, deputeti i zonës. Balla foli fjalët më të mira për Lleshajn, ndërsa tregoi se ai kishte punuar shumë muajt e fundit në Elbasan për të luftuar krimin.
Por ndryshe ndodh në realitet.
Elbasani është një nga qytetet më të inkriminuar, ndërsa sot një vrasje tronditi qytetin. Bujar Çela, vëllai i Talo Çelës (në kërkim për grabitjen në Rinas dhe vrasje) u ekzekutua me armë zjarri, teksa po hynte në një lokal.
Burimet thonë se Bujar Çela nuk ka pasur lidhje me aktivitetin kriminal të vëllait të tij. Ndërkohë Talo Çela qëndronte i fshehur prej kohës.
Por kush është Talo Çela?
Talo Çela personi i shpallur në kërkim për vrasjen e vëllezërve Haxhia është i dyshuar si i përfshirë në ekzekutimin e katër personave të tjerë, Indrit dhe Arben Dylgjerit dhe një shtetasi turk, ngjarje e ndodhur në 28 dhjetor 2018, si dhe Andi Zylyfit rreth një vit më pas.
Ai rezulton të jetë i përfshirë në grabitjen e ndodhur në Rinas në Prill të vitit të shkuar. Çela u akuzua se kishte ndihmuar në modifikimin e furgonit të përdorur me mbishkrimin “Hetimi Tatimor”, për të futur lehtësisht në pistën e Rinasit, atje dhe ku ndodhi grabitja.
Kjo ngjarje e lidh Çelën pikërisht me vrasjen e dy vëllezërve Haxhia në Durrës. Klevis Alla, bashkëpunëtori i drejtësisë për zbardhjen e kësaj ngjarje ka treguar se Çela i kishte kërkuar një prej vëllezërve Haxhia se ku i kishte fshehur paratë e grabitura në 9 prill të vitit të shkuar.
Këtu nisi dhe konflikti mes palëve që u mbyll me vrasjen e Besmir dhe Viktor Haxhiajt, ngjarje e ndodhur në biznesin e tyre të tregut të makinave me qira në zonën e njohur si “Nishtulla” në “Shën Vlash” të Durrësit.
Grupi kriminal ku bëjnë pjesë edhe autorët e ekzekutimit të dy vëllezërve, dyshohet se kanë urdhëruar vrasjen e Dorjan Shkozës dhe Anxhelo Avdias. Ngjarje e ndodhur me datë 2 mars po të njëjtën zonë në Durrës.
Mësohet se pak ditë më parë RENEA, ka kryer një operacion në qytetin e Elbasanit me qëllim arrestimin e Çelës, pasi dyshohej se ky i fundit fshihej në shtëpinë e Ervis Dakës, por operacioni për kapjen e tij dështoi.
