Sandër Lleshaj, ministër i Brendshëm, tha mbrëmjen e sotme se nuk ka ndërmend të japë dorëheqjen.
Lleshaj u pyet lidhur me Gjovalin Lokajn, ish-pjesë e Sigurimit të Shtetit, ndërsa theksoi se tashmë ai ka kaluar Vetting dhe bazuar në verifikimet e kryera ka rezultuar se ai nuk ka qenë asnjë ditë aktiv në strukturat e Sigurimit të Shtetit.
“Lokajn nuk e emërova unë, atë e gjeta atje, por unë mbaj përgjegjësi për të, përderisa unë se kam larguar”, tha Lleshaj.
Sipas tij, ligji nuk ka klauzolë që të përjashtojë automatikisht këto raste.
“Nuk kemi polici të politizuar, unë e kam për nder që sot punoj me oficerë që kanë 30 vjet që i japin këtij vendi në aspektin e sigurisë dhe luftën ndaj krimit”, tha Lleshaj.
Ai tha se nëse policia mbron një qeveri legjitime, atëherë ajo bën një detyrë ligjore. “Policia i ka qëndruar gjithmonë zbatimit të ligjit edhe gjatë protestave. Është hera e parë që protestat e atij niveli dhune u menaxhuan pa gjak, pa viktima. Partnerët ndërkombëtare që kanë monitoruar veprimet e policisë, e kanë vlerësuar”, tha Lleshaj.
I pyetur për policët pa numra në rastin e shembjes së Teatrit, Lleshaj tha se “numri ka vlerë kur ai bën detyra individuale. Ata vepruan si strukturë, ishin nën komandën e dikujt tjetër. Turpi ynë është që pvrgjegjësia kërkohet në mënyrë individuale”.
