Deputeti socialist Alket Hyseni është munduar sot të justifikojë vendimin për hapjen e kazinove në Tiranë, por duke bërë një deklaratë paksa të çuditshme.
Sipas ligjvënësit socialist, qendra e Tiranës nuk banohet nga njerëz të zakonshëm.
“Qendra e Tiranës nuk banohet nga njerëz të zakonshëm, ju e dini. Dhe do të jetë një në qendër. Nëse dikush ka vullnet për të luajtur mund të shkojë edhe në Malin e Zi.
Ka disa shqiptarë që ikin e luajnë në Malin e Zi. Ka të huaj që duan të vijnë të luajnë, ne po flasim për këtë pjesë. Nuk mund të flasim me konceptet e marksizmit.
Kjo nuk është një temë që i intereson njerëzve të thjeshtë. Ne i hoqëm mundësinë familjeve të varfëra, që sa dilnin nga shtëpia kishin tabela shumëngjyrëshe me drita që i thithnin ata.
Është i njëjti ligj, nuk ka ndryshuar, është ligji që thotë në zona turistike dhe në hotele me 5 yje. Kjo përcakton që një zonë të caktuar nuk mund të kemi më shumë se një kazino, u shpreh ndër të tjera Hyseni në “Abcnews”.
Nuk dihet se mbi çfarë kriteri, ligjvënësi socialist përcakton njerëzit e zakonshëm nga ata të pazakonshëm, por me ndërtimet e shumta dhe mbipopullimet, qendra e kryeqytetit përfshin të gjitha shtresat dhe kategoritë, nga ata që në sytë e ligjvënësit socialist mund të jenë të pazakonshëm, te ato që janë plotësisht të zakonshëm.
Ervin Bushati, një tjetër deputet i PS-së thekson se përpara disa vitesh kemi marrë një inisiativë shumë të mirë dhe kemi propozuar një ligj e cila ka larguar të gjithë lojërat e fatit të cilat ishin kthyer në problem të shoqërisë shqiptare.
“Ligji është shumë i mirë. Ne nuk mund të mohojmë realitetin dhe kanë nevojë për të ndihmuar ekonominë dhe turizmin, siç e kanë edhe vendet e tjera dhe është e parashikuar në ligj që mund të kemi kazino. Nuk jam inxhinier apo urbanist që të flas më tej”, u shpreh deputeti.
Rikthimi te kazinotë
Vendimi për lejimin e kazinove u mor 7 muaj para zgjedhjeve parlamentare. Ndoshta ky vendim mund të mos ketë drejtëpërdrejtë lidhje me zgjedhjet, por referuar deklaratave të mëparshme të Edi Ramës, çdo justifikim për rikthimin e kazinove është i pabesueshëm.
Në tetor në 2019, Rama deklaronte se në territorin e Republikës së Shqipërisë nuk do të ngrihet më asnjë qepen për baste.
“Do të pushojnë së funksionuari të gjithë kazinotë elektronike, ndryshimi i sotëm përfshin edhe bastet sportive si dhe çdo lloj basti”, deklaroi ai.
“E vërteta është që do të mbyllen të gjitha. Dhe ne kemi ngritur grup ekspertësh për të bllokuar edhe bastet online që janë jashtë”, deklaronte Rama.
Gjatë shqyrtimit në Kuvend, kryeministri njoftoi se deputetët ishin kërcënuar, edhe pse asnjë kallëzim nuk u bë në prokurori për këto pretendime.
“Jam shumë i keqardhur që një pjesë e deputetëve janë kthyer në shënjestër e një sulmi vulgar mesazhesh të orkestruara nga burgu 313”, tha ai
Duke iu referuar shifrave, Rama shprehej se “68 % e lojtarëve aktive të basteve kanë nisur aktivitetin në moshën 10 vjec deri në 15 vjeç. Si rrjedhojë e këtij stresi 1 në 4 lojtarë pranojnë se u ka shkuar në mendje të vrasin veten”.
Ligji i Qeverisë lejonte hapjen e kazinove vetëm në hotele me 5 yje në zonat turistike, që siç shprehej kryeministri në janar të 2019-ës, Tirana nuk përfshihej.
