Partia Demokratike ka hedhur dyshime se kryeministri Edi Rama miratoi ligjin për rihapjen e kazinove për interesa të një burgosuri në burgun 313, me të cilin sipas PD, kryeministri bashkëpunon.
Nga disa pyetje që Paloka i drejton Ramës, lë të kuptohet se bëhet fjalë për vëllezërit Avdylaj, të arrestuar si drejtues të një bande që trafikon drogë dhe të lidhur me ish-kryebashkiakun e Durrësit Vangjush Dako, siç zbuluan përgjimet e dosjes 339.
Paloka i ka drejtuar 5 pyetje Ramës:
- Për llogari të cilit të burgosur te 313-ta po lejon sërish lojrat e fatit?
- Për llogari të kujt i mbylle 2 vjet më parë?
- Pse e more këtë vendim në fshehtesi dhe me nxitim në kulmin e krizës, ku shqiptarët po vuajnë për ushqimin e përditshëm?
- A është ndonjëri nga ata më të cilët ishe mbrëmë përfitues i këtij vendimi?
- Çfarë pazari mbylle me shoket e përgjimeve të Vangjushit?
Sipas tij, këto pyetje duhet ti bëhen Ramës edhe nga Prokuroria e Posaçme Anti-Korrupsion.
Në 2 shtator, qeveria miratoi ligjin që lejon hapjen e kazinove vetëm në qendër të Tiranës. Sipas vendimarrjes, kazinotë do të lejohen të hapen vetëm në një zonë të ngushtë që përfshin Sheshi Skënderbej, sheshin pas Pallatit të Kulturës, Parkun Rinia dhe zonën pranë Sahatit, zonën pas Teatrit Kombëtar pëfshi Qendrën Toptani.
