Një tjetër anëtar i grupit që merrej me vjedhje në Tiranë, është vënë në pranga.
“Në vijim të operacionit, nga shërbimet e Policisë të Komisariatit Nr.2, në bashkëpunim me Policinë Rrugore, u bë kapja dhe ndalimi i shtetasit A.R., 45 vjeç, banues në Durrës, autori kryesor i vjedhjeve, i dënuar më parë për veprat penale ‘Prodhimi dhe shitja e narkotikeve’ dhe ‘Armëmbajtja pa leje’. Ky shtetas, në bashkëpunim me shtetasit e tjerë të arrestuar, vidhte kasaforta, sende me vlerë dhe shuma parash në banesa të ndryshme në Tiranë. Gjatë kontrollit fizik dhe në banesën e këtij shtetasi u gjetën dhe u sekuestruan në cilësinë e provës materiale sendet me vlerë të vjedhura në banesa, shuma të konsiderueshme parash (euro dhe lekë), veshje, 3 aparate celular, njëra prej kasafortave të vjedhura, 1 automjet dhe sendet që autorët përdornin për të kryer vjedhjet. Po në vijim të operacionit u bë i mundur dokumentimi i vjedhjes në banesën e shtetasit E.Ç., ku autorët kanë marrë bizhuteri dhe një shumë parash”, njoftoi policia.
Vijon puna për kapjen e shtetases që është shpallur në kërkim dhe për dokumentimin e vjedhjeve të tjera të ndodhura në qarkun e Tiranës, në të cilat mund të jenë të implikuar këta shtetas, shtuan të njëjtat burime.
