Nga Boldnews.al
Kryeparlamentari Gramoz Ruçi, në një fjalim të gjatë para nisjes së sesionit të ri të Parlamentit të sajuar pasi justifikoi ndryshimet Kushtetuese të 30 korrikut kapërceu edhe në një tjetër temë, atë të drejtësisë së re.
Pak fraza shkëputi, por me një domethënie të madhe pasi edhe publikisht po pranohet se çdo qelizë e sistemit të ri të drejtësisë është e kapur dhe kur i nëvojitet “kapësëve” të veshur me kostumet shik të politikës të japin edhe urdhër dhe përcaktojnë kohën në mënyrë ultimative.
“Brenda këtij sesioni, me hir ose me pahir, Gjykata Kushtetuese do të bëhet funksionale. Më 1 janar 2021 gjyqtarët e rinj kushtetues do të kenë filluar nga puna”-tha Gramoz Ruçi në fjalën e tij. Para se të jepte këtë ultimatum, theksoi se KED dhe KLGJ kishin shkelur në mënyrë të pakuptimtë afatet.
“KED-i, pas miratimit të amendamenteve mbi procedurën e verifikimit, vlerësimit, pikëzimit e renditjes së kandidatëve për Gjykatën Kushtetuese, vendosi ndalimin e kandidimit për kandidatët për dy vendet vakante të shpallura nga Kuvendi e Presidenti i Republikës. KED-it iu desh gati një vit të shqyrtonte dy kandidatura! Me këto vonesa të zgjatura, tashmë kupa ka filluar të derdhet dhe ky shpërpjestim midis investimit të Kuvendit dhe investimit institucional të një pjese të organeve të reja të sistemit, nuk do të tolerohet më”-tha prerë Ruçi.
Kjo nuk është klithja e një pushteti në kërkim të drejtësisë, por shpërthimi i një kaste politike e cila kërkon që nëpërmjet gjoja institucioneve të reja të betonizojë pushtetin e saj në vijim të autoritarizmit, mungesës së zgjedhjeve dhe vulosjes së një palë zgjedhjesh të dysnimta. Duhet “vula” e një gjykate dhe ajo vulë të jetë në zyrën kryeministrore, për të certifikuar çdo nismë e shkelje të ligjit themeltar të vendit.
Që në këto momente kur një sistem drejtësie “i pavarur në letra” urdhërohet të kapi një afat kohor dhe me datë fikse për tu formësuar, është thjesht një lodër prodhim “kinez” i porositur nga zyrat e kupolës drejtuese të pushtetit.
Deri para një viti ishin po këta politikanë që britnin me të madhe se nuk duhet të ndërhyjnë në drejtësinë e re dhe se ajo duhet të lihet e qetë në punën e saj të “pavarur”. Ishte po Ardian Dvorani që mbrohej me fanatizëm nga ky Parlament që në kundërshtim me ligjet mënjanoi kreun e shtetit dhe Kushtetutën e vendit e çuan në një zyrë të vogël noterie buzë lumit Lanë…
Po përse kjo nxitje dhe ky ngut për të kapur fillimin e vitit të ardhshëm me anëtarë të rinj të Gjykatës Kushtetuese? Kjo ka një qëllim dhe duket se ka vetëm një arsye që vjen si nevojë e pushtetit absolud që nëpërmjet një gjyqësori të ngjizur dhe rritur në zyrat e partisë të shënbejë si aureolë e një qeverisje që për qëllim të cilën e ka arrirë kishte kapjen e çdo institucioni të pavarur.
Me ultimatumin e Ruçit e sigurt është që KED dhe KLGJ do të vihen në lëvizje për të dërguar emrat që do të plotësojnë të paktën gjashtë vende në Gjykatën Kushtetuese që ajo të bëhet funksionale. Me siguri data 1janar 2021 nuk do kalohet… ultimatum i Ruçit nuk diskutohet, thjesht zbatohet!
