OBSH-ja rekomandoi përdorimin e vazhdueshëm të kortikosteroideve tek pacientët e prekur nga një formë e rëndë apo kritike e COVID-19, duke iu referuar studimeve që tregojnë se këto medikamente reduktojnë vdekshmërinë tek këta të sëmurë, sipas direktivave të publikuara nga revista mjekësore BMJ.
Ky dokument detajon rekomandimet tashmë të publikuara nga Organizata Botërore e Shëndetësisë (OBSH) në faqen e saj të internetit, pas botimit të një serie studimesh në revistën mjekësore amerikane “Jama” që tregojnë efekasitetin e këtyre medikamenteve.
“Ne rekomandojmë përdorimin sistematik të kortikosteroideve (…) për trajtimin e pacientëve me forma të rënda ose kritike të COVID-19”, shkruan paneli i ekspertëve të mandatuar nga OBSH.
“Nga ana tjetër, ne sugjerojmë mospërdorimin e kortikosteroideve në trajtimin e pacientëve që nuk kanë një formë të rëndë të COVID-19”, theksojnë ata duke shtuar se kjo nuk vlen për pacientët që tashmë ishin duke marrë këto barna për arsye të tjera përveç COVID-19.
Studimet e botuara në “Jama” konkludojnë një ulje mesatare prej 21% të vdekshmërisë pas 28 ditësh për pacientët e prekur nga forma të rënda të COVID-19.
Kortikosteroidet janë i vetmi trajtim që ka treguar një efekt të rëndësishëm në uljen e vdekshmërisë në pacientët me COVID-19.
Rezultati i parë pozitiv ishte njoftuar më 16 qershor nga studiuesit e provës më të madhe klinike Recovery për një prej këtyre medikamenteve, deksametazoni.
/ATA/
