Liga e Kombeve, edicioni i ri i saj, fillon sonte për grupin tonë. Konkretisht, në grupin 4, Shqipëria do të luajë në transfertë, ndaj kombëtares së Bjellorusisë, ndërsa Lituania do të presë Kazakistanin. Të gjithë synojnë një start pozitiv, duke besuar te filozofia popullore se “nisja e mbarë është gjysma e punës”. Edhe kuqezinjtë tanë kanë udhëtuar me këtë mendësi në Minsk. Pavarësisht disa mungesave të rëndësishme, për shkaqe të ndryshme, trajneri Edi Reja duket optimist. Të paktën kështu u hoq në konferencën para ndeshjes, edhe pse të papriturat në këtë situatë pandemie dhe moszhvillimi të miqësoreve paraprake janë të konsiderueshme.
Trajneri veteran italian ka vendosur të mos bëjë eksperimente, por t’u besojë senatorëve në këtë sfidë inauguruese të edicionit të ri kualifikues. Kështu, porta do t’i besohet Strakoshës, ndërsa para tij treshja e mbrojtjes, e përbërë nga Dermaku në qendër, Veseli në të majtë dhe Gjimshiti në të djathtë. Kapiteni Hysaj spostohet në mesfushë, konkretisht në të djathtë. Ky repart do të jetë i ngjeshur, me pesë emra. Në të majtë do të startojë Roshi, ndërsa të brendshëm pritet të rreshtohen Gjasula, Laçi dhe Bare. Në fakt, Laçi është debutues dhe ka një problem dëmtimi, kështu që do të shihet sërish situata e tij. Pak para ndeshjes do të vendoset përfundimisht nëse do të jetë në fushë apo jo.
Gjithsesi, Abrashi është gati, nëse dibrani nuk ia del. Sulmi do të ketë dy “strategë” të sprovuar, si Cikalleshi dhe Sadiku. Pra, trajneri kuqezi i beson eksperiencës në këtë transfertë, duke e kthyer kokën nga të rinjtë vetëm nëse gjendja fizike e titullarëve nuk do të jetë e duhura gjatë lojës. Tri zëvendësime janë pak për Edi Reja, në këtë situatë pandemie, por UEFA nuk ka lejuar 5 të tilla, si për klubet, mbas kthimit nga mbyllja prej Covid-19.
Kjo ndeshje do të luhet në “Dinamo National Olympic Stadium”, prej orës 20:45. UEFA ka përcaktuar edhe gjyqtarët që do të bëjnë drejtësi në këtë sfidë të grupit 4 të Ligës së Kombeve. Ata janë suedezë: Kristoffer Karlsson, Daniel Gustavsson dhe Max Robin Ëilde.
Sikurse dihet tashmë, me ekipin nuk kanë udhëtuar Hysen Memolla, Ylber Ramadani dhe Ardian Ismajli, të dëmtuar. Po kështu, jashtë dy kualifikueseve të shtatorit mbetet edhe Marash Kumbulla, i dëmtuar me skuadrën e tij. Kujtojmë se për këtë ndeshje, Armando Broja është i pezulluar, ndaj nuk llogaritet nga trajneri Reja.
Formacioni i mundshëm sipas Telesport:
