Kryebashkiaku i Kukësit, Safet Gjici, ka dalë sot me dy qëndrime ndaj deputetes socialiste Mimi Kodheli, e cila është lënë jashtë listës së drejtuesve politikë nga Kryeministri Edi Rama.
Në një deklaratë të parë, Gjici tha se deputetja aktuale e këtij qarku Mimi Kodheli nuk ka qenë asnjëherë në këtë qytet për hallet e qytetarëve.
“Ajo ka problemet e veta nuk ka lidhje me punën time. PS e solli si kryesuese e deputetëve të listës për qarkun e Kukësit, e mbështetëm dhe sot ka mandatin, por nuk kemi sistem tjetër zgjedhor, dhe kandidatët me më shumë vota përfaqësohen në parlament, nëse do ndiqnim këtë model mandatin do ta kisha unë jo Kodheli. Ajo s’ka qenë asnjëherë këtu për hallet e Kukësit” është shprehur në një intervistë për Fax News Gjici.
Por duket se disa orë më pas Gjici ka reflektuar, ose dikush i ka tërhequr vëmendjen, pasi Kryebashkiaku ka bërë një sqarim në rrjetet sociale, ku flet për raportet e mira me Ilir Beqajn dhe Mimi Kodhelin.
“Të nderuar miq dua të bëj një reagim të detyruar në lidhje me keqinterpretimin që i është bërë deklaratës sime sot në media.
Unë kam patur dhe vazhdoj që të kem marrëdhënie dhe bashkëpunim të shkëlqyer me ish të deleguarin politik të qarkut Kukës z. Ilir Beqja dhe deputeten znj. Mimi Kodheli ku kemi bërë shumë punë së bashku
Në familjen tonë politike të gjithë jemi për një qëllim,fitoren e Partisë Socialiste.”, shkruan Gjici.
Nuk dihet se çfarë ka ndodhur me Kryebashkiakun e Kukësit që ka ndryshuar qëndrimin ndaj Kodhelit, e cila në mandatin e parë të Ramës si Kryeministër mbante postin e ministres së Mbrojtjes.
