Kryeministri Edi Rama, njëherazi kryetar i PS, ka thirrur një mbledhje me kryebashkiakët, një ditë para mbledhjes së Asamblesë Kombëtare.
Takimi me kryebashkiakët, që pritet të mbahet nesër, pritet të ketë në qendër të vëmendjes tematikën e zgjedhjeve të ardhshme.
Një ditë më parë, Kryeministri Edi Rama mblodhi grupin parlamentar, ku dha porositë lidhur me angazhimin e deputetëve në zgjedhje, por njëherazi i paralajmëroi se askush nuk do e ketë vendin të sigurtë në lista.
Me drejtuesit e pushtetit vendor, që i përkasin në të gjitha bashkitë e vendit PS, me përjashtim të Shkodrës, Rama pritet të japë udhëzimet për angazhimin e tyre, krah drejtuesve politikë sipas qarqeve, për arritjen e një fitoreje në mandatin e 3-të qeverisës.
Të premten do të jetë Asamblea që do të zyrtarizojë edhe miratimin e drejtuesve politikë, ku qartazi Rama i besoi “gardës” së vjetër, ose më saktë atyre që në 2013 e çuan drejt fitores së zgjedhjeve, ndërsa anashkaloi ministrat aktualë, me shumë pak përjashtime.
Asamblea gjithashtu do të zgjedhë Kryesinë e re të PS-së, ku pritet që të ketë jo pak surpriza, pasi emra të njohur në rradhët e Rilindjes mund të mbeten jashtë forumit më të lartë politik të kësaj partie.
